Suqiao 96 GB-lıq RTX 5090 videokartını satır, həqiqiliyi təsdiqlənməyib

    Çinin “Suqiao” şirkəti yaddaşı 96 GB-a artırılmış “GeForce RTX 5090” videokartını “Alibaba”da satışa çıxarıb. Standart modeldə 32 GB videoyaddaş var. Dəyişdirilmiş versiyada isə bu həcm 3 dəfə çoxdur. Məhsul 3888 dollar (təxminən 6610 manat) qiymətinə satılır. Bu, ABŞ-dəki başlanğıc qiymətdən təxminən 35% aşağıdır. Ancaq elanda göstərilən bəzi texniki məlumatlar bir-biri ilə uyğun gəlmir. Buna görə videokartın həqiqi olub-olmadığı hələ təsdiqlənməyib.

    “Suqiao” 10 ildən çoxdur videokart, ana plata və server istehsal edir. Şirkət başqa markalar üçün də avadanlıq hazırlayır. Çində yaddaşı artırılmış videokartlardan əsasən süni intellekt modellərini işlətmək üçün yararlanırlar. Daha əvvəl “GeForce RTX 5080” 32 GB, “GeForce RTX 4090” 48 GB və “GeForce RTX 3090” 48 GB kimi dəyişdirilmiş modellər də ortaya çıxıb.

    Videokartda 96 GB yaddaşın olması texniki baxımdan mümkündür. “RTX Pro 6000 Blackwell” modeli də eyni “GB202” qrafik prosessoru ilə işləyir. Bu modeldə hər biri 3 GB tutumlu 32 ədəd GDDR7 yaddaş çipi var və ümumi yaddaş 96 GB təşkil edir. Dəyişdirilmiş “GeForce RTX 5090” üçün xüsusi plata lazım ola bilər. Yaddaş çiplərini platanın həm ön, həm də arxa tərəfinə yerləşdirməklə ümumi tutumu 2 dəfə artırmaq mümkündür.

    Lakin “Alibaba”dakı elanda yaddaş növü GDDR6X, məlumat ötürmə sürəti isə 14 Gbps göstərilib. Bu məlumatlar 96 GB yaddaş iddiasına uyğun gəlmir. “Micron” GDDR6X çiplərini yalnız 2 GB tutumda istehsal edib. 96 GB yaddaş üçün isə hər biri 3 GB olan çiplər lazımdır. Bundan başqa, GDDR6X yaddaşın sürəti 19 - 24 Gbps arasında olur. Elanda göstərilən 14 Gbps sürət isə adi GDDR6 yaddaşa uyğundur.

    Yaddaşı dəyişdirilmiş “Nvidia” videokartlarının işləməsi üçün proqram təminatına və cihazın daxili proqramına müdaxilə etmək lazımdır. “GeForce RTX 4090” 48 GB modeli də dəyişdirilmiş daxili proqramla işə salınmışdı. İddialara görə, “GeForce RTX 5090” üçün uyğun daxili proqram bir neçə aydır yayılıb. 96 GB yaddaşlı modellərin indi ortaya çıxması bununla bağlı ola bilər.

    Elanın qiyməti də diqqət çəkir. “Alibaba”dakı digər satıcılar 96 GB yaddaşlı modeli təxminən 5900 dollar (təxminən 10030 manat) qiymətinə təklif edirlər. ABŞ bazarında xüsusi “GeForce RTX 5090” modellərinin qiyməti 6000 dollardan (təxminən 10200 manat) başlayır. “Nvidia”-nın 96 GB yaddaşlı “RTX Pro 6000 Blackwell” modeli isə 16000 dollardan 17999 dollaradək (təxminən 27200 manatdan 30600 manatadək) satılır. Buna görə də sözügedən videokart həqiqidirsə, süni intellekt işləri üçün daha ucuz seçim ola bilər.