Samsung Galaxy A07s smartfonunu satışa çıxardı: 6 il yeniləmə alacaq

    “Samsung” büdcə seqmentinə aid “Galaxy A07s” smartfonunu geniş təqdimat keçirmədən satışa çıxarıb. Cihaz hazırda Levant regionunda, konkret olaraq İordaniyada satılır. Model avqustda “Galaxy A08” ilə birlikdə “Google Play Console” bazasında görünmüşdü. Smartfon qara, yaşıl və açıq bənövşəyi rənglərdə təklif olunur.

    “Galaxy A07s” 6 nm texnoloji proseslə hazırlanan 8 nüvəli “MediaTek G99+” prosessoru ilə işləyir. Versiyadan asılı olaraq cihaz maksimum 6 GB RAM və 128 GB daxili yaddaşla gəlir. Yaddaşı microSD kartı ilə artırmaq mümkündür. Smartfonun 6,7 düymlük HD+ LCD ekranı 90 Hz yenilənmə tezliyinə malikdir. Bu göstərici səhifələri sürüşdürərkən görüntünün daha axıcı görünməsinə kömək edir.

    Arxa tərəfdə 50 MP əsas kamera və portret çəkilişlərində fonu obyektdən ayırmağa kömək edən 2 MP dərinlik sensoru yerləşir. Ön hissədə isə 8 MP selfi kamerası var. “Galaxy A07s” 5000 mAh tutumlu batareya ilə təchiz edilib. IP54 qoruma səviyyəsi cihazı tozdan və su sıçramalarından müəyyən qədər qoruyur. Barmaq izi skaneri gövdənin yan hissəsində yerləşir.

    Smartfon “Android 16” əsaslı “OneUI” əməliyyat sistemi ilə işləyir. “Samsung” bu modelə 6 il ərzində əməliyyat sistemi və təhlükəsizlik yeniləmələri təqdim edəcək. Cihazda 3,5 mm qulaqlıq girişi, 2 diapazonlu Wi-Fi, GPS, Bluetooth 5.3 və USB-C portu var. Lakin təmassız ödənişlər üçün NFC və telefonun hərəkətini dəqiq ölçən aparat giroskopu dəstəklənmir.