Samsung Galaxy A36 5G smartfonu Geekbench testlərindən keçib

    Samsung şirkəti hal-hazırda Galaxy A36 5G smartfonu üzərində çalışır. Məlum olub ki, sözügedən smartfon Geekbench testlərindən keçib. Bunun sayəsində smartfon barəsində bəzi təfərrüatlar ortaya çıxıb. Beləliklə Geekbench-in məlumatlar bazasına əsasən Galaxy A36 5G-nin prosessoru özündə 1.8 GHz tezlikdə çalışan 4 ədəd nüvəni və 2.4 GHz tezlikdə çalışan 4 ədəd nüvəni birləşdirir. Bu özəlliklər isə Snapdragon 6 Gen 3 prosessoruna işarə edirlər.

        Lakin istisna deyil ki, nəticədə smartfon Snapdragon 6 Gen 1 prosessoru vasitəsilə çalışsın. Geekbench testlərindən smartfonun 6 GB RAM-a sahib versiyası keçib. Üstəlik Geekbench sayəsində məlum olub ki, Galaxy A36 5G qutudan Android 15-i əldə edəcək. Smartfon Geekbench-in bir nüvəli testi çərçivəsində 314 xal, çox nüvəli testi çərçivəsində isə 1279 xal toplayıb. Çox güman ki, Galaxy A36 5G gələn ilin birinci yarısında təqdim olunacaq.