Samsung Galaxy S27 seriyasının yaddaş seçimləri sızdırılıb

    “Samsung”un növbəti flaqman telefonları olacaq “Galaxy S27” seriyasının RAM və daxili yaddaş seçimləri sızdırılıb. Məlumata görə, əvvəlki nəsillə müqayisədə yaddaş tutumunda ciddi artım olmayacaq. “Galaxy S27” və “Galaxy S27 Plus” modellərində 12 GB RAM, həmçinin 256 GB və ya 512 GB daxili yaddaş ola bilər. Standart modeldə 128 GB seçiminin ləğvi və başlanğıc yaddaşın 256 GB-a qaldırılması gözlənilir.

    “Galaxy S27 Ultra”nın 256 GB və 512 GB versiyalarında 12 GB RAM ola bilər. Ən yüksək yaddaş tutumlu 1 TB modeldə 16 GB RAM olacaq. Bu seçimlər “Galaxy S26 Ultra” ilə eynidir. Yeni “Galaxy S27 Pro”nun 256 GB, 512 GB və 1 TB versiyalarının hər birində 12 GB RAM gözlənilir. Telefon daha kiçik “Ultra” modeli kimi göstərilsə də, 1 TB versiyasında RAM 16 GB-a çatmayacaq.

    “Galaxy S27 Pro” və “Galaxy S27 Ultra” modellərində daha sürətli LPDDR6 RAM və UFS 5.1 daxili yaddaş standartı işlədilə bilər. LPDDR6 proqramların daha çevik işləməsinə, UFS 5.1 isə faylların daha sürətli açılıb köçürülməsinə kömək edir. Bu yeniliklərin yalnız yüksək yaddaş tutumlu versiyalara əlavə olunacağı ehtimal edilir. “Galaxy S27” və “Galaxy S27 Plus” modellərində isə əvvəlki LPDDR5X RAM-ın qalacağı deyilir.

    Çində aparılan son sertifikatlaşdırma prosesi 2 modelin batareya göstəricilərini də üzə çıxarıb. Sənəddə “Galaxy S27 Pro” üçün 5200 mAh batareya göstərilir. “Galaxy S27 Ultra”da isə daha böyük, 5700 mAh batareya ola bilər. Hər iki smartfonun 60 Vt gücündə naqilli şarjı dəstəkləyəcəyi qeyd olunur. “Samsung” bu texniki məlumatları hələ rəsmi olaraq təsdiqləməyib.

    Yaddaş artımının məhdud qalması süni intellekt sistemləri üçün qurulan məlumat mərkəzlərinin çiplərə tələbatı artırması ilə əlaqələndirilir. RAM və saxlama çiplərinin qıtlığı istehsalçıları yaddaş tutumunu azaltmaq və ya qiymətləri yüksəltmək seçimi qarşısında qoyur. Tutumların dəyişməməsi “Galaxy S27” seriyasının qiymətini nəzarətdə saxlamağa kömək edə bilər. Ancaq “Qualcomm”un yeni prosessorlarının bahalaşması flaqmanların daha yüksək qiymətlə satışa çıxması ehtimalını artırır.