Samsung Galaxy Tab S12+ və S12 Ultra planşetlərinin görüntüləri sızdı

    “Samsung”un “Galaxy Tab S12+” və “Galaxy Tab S12 Ultra” planşetlərini sentyabrda göstərəcəyi gözlənilirdi. Ancaq yeni şayiələr təqdimatın 7 oktyabrda baş tuta biləcəyini göstərir. İnternetə sızan görüntülər hər iki modelin əvvəl görünən dizaynını təsdiqləyir və aralarındakı əsas fərqləri göstərir.

    “Samsung Galaxy Tab S12 Ultra”nın ekranının yuxarı hissəsində çərtük, arxasında isə 2 kamera var. Sızan görüntülərdə ekranın kənarındakı çərçivələrin daha nazik olduğu görünür. Planşetin ekranı 14,6 düym, qalınlığı 5,1 mm olacaq.

    “Samsung Galaxy Tab S12+” modelinin ekranında çərtük yoxdur, amma çərçivələri Ultra ilə müqayisədə daha qalındır. Arxa tərəfdə yalnız 1 kamera görünür. Sızan görüntülərə görə, planşetin ekranı 12,6 düym, qalınlığı 5,3 mm olacaq.

    Hər iki planşetin gövdəsi metal olacaq və stilus qələmlə işləyəcək. “Galaxy Tab S12 Ultra” üçün suya və toza davamlılığı göstərən IP68 qoruması qeyd olunub. “Galaxy Tab S12+”ın görüntüsündə suya davamlılıq işarəsi görünsə də, IP68 dərəcəsi açıq yazılmayıb. Şəkillər Plus modelində 5G, Ultra modelində isə LTE mobil bağlantısının olacağını da göstərir.