Samsung öz yeni qatlana bilən smartfonunun ilk tizerini təqdim edib

     Samsung şirkəti yeni qatlana bilən smartfonunun ilk rəsmi tizerini yayımlayıb. Animasiyadan və onu müşayiət edən mətndən belə görünür ki, bu cihaz yeni ad ilə təqdim oluna və ya hətta şirkətin cihazlar seriyasında yeni kateqoriyaya keçid edə bilər. Rəsmi saytındakı məqalədə Samsung bu qatlana bilən smartfonun funksionallığını təsvir edir, lakin Z Fold seriyasının adı çəkilmir. Əvəzində, mətndə Galaxy Ultra adı hallanır və məqalənin əvvəlində bu cihaz kateqoriyasının necə yarandığı haqqında məlumat verilir.

     “Uzun illərdir ki, Samsung istifadəçilərin istəklərinə qulaq asır - onlar böyük ekranlar, daha yaxşı kameralar və kontent yaratmaq və bağlantı üçün yeni yollar tələb edirdilər. Bu istəklər aydındır: Ultra təcrübə - sadəcə təkmilləşdirilmiş funksiyalar siyahısından kənara çıxan, daha kompakt və portativ form-faktorda təqdim olunan bir yanaşma” - deyə məqalədə bildirilib. Hələlik burada söhbətin rebrendinqdən getdiyi, yoxsa tamamilə yeni bir modelin buraxılmasından bəhs olunduğu məlum deyil. Lakin sahə üzrə ixtisaslaşmış KİV-lərin fikrincə, “Ultra üçün yeni fəsil” şüarı ikinci varianta - yeni modelin təqdimatına işarə edir.