Samsung-un ilk 3 qat qatlana bilən smartfonunun ilk təsvirləri təqdim olunub

     Samsung qatlana bilən smartfonlar dünyasında növbəti addımı atmağa hazırlaşır. Bu dəfə yeni 3 qat qatlana bilən formatla. Android Authority tərəfindən əldə edilmiş məlumatlara əsasən, OneUI 8-in son versiyasındakı animasiya faylları sayəsində Samsung Galaxy G Fold (və ya kod adı ilə Multifold 7) haqqında ilk görüntülər ortaya çıxıb. Rəsmi təqdimatın artıq gələn həftə Samsung Unpacked tədbirində baş tutacağı gözlənilir. Yeni cihaz iki daxili şarnirə malik olacaq və G-fold sxeminə əsasən qatlanacaq - bu, Huawei Mate XT modelindəki S-fold mexanizmindən fərqlənir, çünki orada şarnirlərdən biri xaricə işləyir. G-fold dizaynı ekranı zədələnmələrdən daha yaxşı qorumağa və cihazı qatlanmış vəziyyətdə daha kompakt saxlamağa imkan verir. Galaxy G Fold üç arxa paneldən ibarət olacaq:

- Sol panel - böyük ehtimalla müasir Z Fold modellərindəki kimi üçlü kameraya malik olacaq.

- Orta panel - qapalı rejimdə istifadə üçün köməkçi ekran və ön kameraya sahib olacaq.

- Sağ panel - ekran olmayan, yalnız konstruksiyanın möhkəmliyini təmin edən hissə kimi görünəcək.

     Animasiyalar göstərir ki, şarnirlərin ölçüləri fərqlidir - bu, ekranın bərabər qatlanması və artıq təzyiqin qarşısını almaq üçün nəzərdə tutulub. Daha bir maraqlı detal isə budur ki, kodda istifadəçilər üçün xəbərdarlıq mövcuddur: cihazı kamera olan panel içəridə qalacaq şəkildə qatlamaq olmaz. Bu, mexanizmə zərər verə bilər.