Sharge HDMI-li və kart oxuyuculu Disk Pro 2 SSD korpusunu təqdim edib

    “Sharge” istifadəçinin öz M.2 SSD-sini quraşdıra bildiyi “Disk Pro 2” xarici korpusunu təqdim edib. Qurğu SSD korpusu ilə yanaşı, USB və HDMI bağlantı mərkəzi, həmçinin kart oxuyucusu kimi işləyir. Aktiv soyutma sistemi də var. “Disk Pro 2” 2230, 2242 və 2280 ölçülü M.2 yaddaş qurğuları ilə uyğun gəlir və 8 TB-a qədər SSD dəstəkləyir. Məhsul “Disk Pro 2 Ultra” və “Disk Pro 2 Lite” versiyalarında satışa çıxarılır.

    “Disk Pro 2 Ultra” HDMI 2.1 bağlantısı ilə 4K təsviri 144 Hz, 8K təsviri isə 30 Hz tezlikdə ötürür. “Disk Pro 2 Lite” modelində HDMI 2.0 bağlantısı var və görüntü ötürülməsi 4K 60 Hz ilə məhdudlaşır. “Ultra” versiyasının minimum enerji tələbi 1,5 Vt, “Lite” modelinin isə 5 Vt-dır. Hər 2 versiyada ümumi məlumat ötürmə sürəti 10 Gbit/s-dir. Buna görə SSD və digər qoşulmuş cihazlar eyni bağlantının sürətini öz aralarında bölüşür.

    Korpusun əsas USB-C bağlantısı noutbuka 80 Vt-a qədər enerji ötürə bilir. Digər USB-C portu 10 Gbit/s sürətlə işləyir və 100 Vt-a qədər enerji qəbul edir. Qurğuda tamölçülü HDMI və USB 3.0 Type-A portları da var. Qarşı tərəfdə SD və microSD kart yuvaları yerləşir. “Ultra” versiyası yaddaş kartlarından məlumatı 180 MB/s sürətlə oxuyur və 120 MB/s sürətlə yazır. “Lite” modelində bu göstəricilər müvafiq olaraq 100 MB/s və 90 MB/s-dir. “Sharge” əvvəlki nəsildəki sabit kabeli çıxarıla bilən USB-C kabeli ilə əvəzləyib.

    Qurğunun kabelsiz ölçüləri 92,6 × 59,2 × 13,5 mm-dir. Korpusun üst hissəsi şəffaf, arxa səthi isə maqnitlidir. Buna görə cihaz “MagSafe” və ya Qi2 dəstəkli smartfonların arxasına yapışa bilir, lakin telefondan enerji almır. Soyutma ventilyatoru söndürülmüş, adi və turbo rejimlərdə işləyə bilər. Aktiv soyutma SSD və bir neçə port eyni vaxtda işlədikdə temperaturu nəzarətdə saxlamağa kömək edir.

    SSD bölməsinin qapağı yan tərəfdəki kiçik vint açıldıqdan sonra çıxarılır. Bundan sonra istifadəçi uyğun M.2 SSD-ni özü quraşdıra bilər. “Lexar 710” ilə keçirilən sınaqda “Disk Pro 2 Ultra” gündəlik işlərdəki sürəti ölçən “PCMark 10” testində yalnız USB4 əsaslı “Corsair EX400U” modelindən geri qalıb. Böyük faylların köçürülməsi zamanı oxuma sürətinə görə 4-cü yeri tutub. Yazma sürətində də yalnız həmin USB4 qurğusu daha yaxşı nəticə göstərib. Yekun sürət korpusa quraşdırılan SSD-dən asılıdır.

    “Disk Pro 2 Ultra” 109 dollara (təxminən 190 manat), “Disk Pro 2 Lite” isə 79 dollara (təxminən 130 manat) satılır. İlkin sifariş dövründə qiymətlər müvafiq olaraq 80,91 dollara (təxminən 140 manat) və 66,51 dollara (təxminən 110 manat) endirilib. Çatdırılmanın 15 oktyabrdan başlanması planlaşdırılır. Ümumi sürət 10 Gbit/s ilə məhdudlaşdığı üçün məhsul daimi masaüstü dokdan daha çox səfərlər üçün nəzərdə tutulub. Qurğu SSD-ni, ekranı, əlavə cihazları və yaddaş kartlarını bir yığcam korpusda birləşdirir.