Sızan videoda iPhone 18 Pro mavi, Pro Max isə tünd albalıdır

    “Apple” şirkətinin növbəti təqdimatına bir neçə gün qalmış “iPhone 18 Pro” və “iPhone 18 Pro Max” modellərinə aid olduğu iddia edilən video yayılıb. Görüntülərdə “iPhone 18 Pro Max” modelinin “Dark Cherry”, “iPhone 18 Pro” modelinin isə mavi rəngli demo nümunələri görünür. Şirkətin tədbirdə bu modellərlə yanaşı ilk qatlana bilən “iPhone” modelini də təqdim edəcəyi gözlənilir.

    Son sızmada “iPhone 18 Pro” seriyası üçün “Dark Cherry”, “Black” və “Sky Blue” rəng seçimləri göstərilib. “Dark Cherry” rəngi “Burgundy” adı ilə də tanınır. Onun bu il seriyanın əsas rəngi olacağı gözlənilir. Yeni rənglərin, xüsusilə tünd albalı çalarının cihazların görünüşündə ən nəzərəçarpan yeniliklərdən biri olacağı bildirilir.

    “iPhone 18 Pro” modellərinin dizaynında “iPhone 17 Pro” seriyası ilə müqayisədə böyük dəyişiklik gözlənilmir. İddialara görə, əsas fərq yeni rənglərlə məhdudlaşacaq. Arxa hissədə dəyişən diafraqmalı yeni əsas kameranın yerləşəcəyi də gözlənilir. Bu sistem çəkiliş şəraitindən asılı olaraq obyektivə daxil olan işığın miqdarını tənzimləyə bilir.

    Hər 2 smartfonun “A20 Pro” prosessoru və yeni modemlə gələcəyi gözlənilir. İddialara görə, modellərin batareyası əvvəlki nəsillə müqayisədə bir qədər böyük olacaq. “Apple” bu məlumatları hələ təsdiqləməyib. Cihazların yekun texniki imkanları yaxınlaşan təqdimat tədbirində açıqlanacaq.