Sony A7R VI təqdim edildi

    Sony yeni yüksək ayırdetmə qabiliyyətli A7R VI kamerasını təqdim edib. Yeni model 66,8 meqapiksellik sensoru ilə yüksək detallı fotolar çəkməklə yanaşı, saniyədə 30 kadr sürətlə fasiləsiz çəkiliş edə bilir. Bununla Sony yüksək meqapikselli kameraların əsas çatışmazlıqlarından biri olan aşağı çəkiliş sürətini faktiki olaraq aradan qaldırıb. Əvvəllər 60 meqapiksel və daha yüksək ayırdetmə qabiliyyətinə malik kameralar əsasən studiya, mənzərə və məhsul çəkilişləri üçün nəzərdə tutulurdu. Böyük həcmli görüntülərin emalı yüksək sürətli çəkilişi çətinləşdirirdi. A7R VI isə yeni tam yığılmış, “fully stacked” sensor və Bionz XR2 prosessoru sayəsində 66,8 MP ölçülü fotoları saniyədə 30 kadr sürətlə çəkə bilir.

    Üstəlik, bu zaman elektron vizördə görüntü kəsilmir. Sensorun məlumatları daha sürətli oxuması “rolling shutter” effektini də minimuma endirdiyindən elektron qapaqdan daha geniş istifadə etmək mümkündür. Beləliklə, kamera tam səssiz rejimdə də yüksək sürətli çəkiliş edə bilir. Bu xüsusiyyət toy, tədbir, küçə, idman və vəhşi təbiət fotoqrafiyası üçün xüsusilə faydalıdır. Bu sürətin isə bir mənfi tərəfi var: faylların həcmi çox böyükdür. A7R VI-nın 9984 × 6656 piksel ölçülü sıxılmış RAW fayllarının hər biri orta hesabla təxminən 60 MB yer tutur. Saniyədə 30 kadr çəkildikdə cəmi bir saniyəlik çəkiliş təxminən 1,8 GB yaddaş tələb edə bilər.

    Sony A7R VI həmçinin 8,5 stop daxili görüntü sabitləşdirmə sistemi, iki USB-C portu və Sony-nin yeni süni intellekt əsaslı avtofokus sistemi ilə təchiz edilib. Yeni avtofokus sistemi insan və digər obyektləri tanıyaraq onları davamlı şəkildə izləyə bilir. 66,8 MP ayırdetmə qabiliyyətinin başqa bir üstünlüyü fotoları sonradan ciddi şəkildə kəsmək imkanının olmasıdır. Məsələn, üfüqi çəkilmiş bir fotodan şaquli sosial media görüntüsü hazırlamaq və ya məhsulun müəyyən hissəsini böyüdərək ayrıca kadr əldə etmək mümkündür. Yüksək ayırdetmə qabiliyyəti buna baxmayaraq kifayət qədər detal saxlamağa imkan verir.

    Kameranın əsas çatışmazlıqlarından biri isə yeni batareyaya keçid edilməsidir. A7R VI əvvəlki Sony modellərində geniş istifadə edilən NP-FZ100 əvəzinə yeni NP-SA100 batareyasından istifadə edir. Buna görə artıq Sony sisteminə sahib olan fotoqraflar köhnə batareyalarını yeni kamera ilə paylaşa bilməyəcəklər. Yeni batareyaya baxmayaraq, kamera bir enerji doldurma ilə CIPA standartına əsasən 600-dən bir qədər çox kadr çəkə bilir.