Sony ilk Walkman-la çıxan qulaqlığı 47 il sonra yenidən satır

    “Sony” 1979-cu ildə ilk “Walkman TPS-L2” kaset pleyeri ilə birlikdə çıxardığı “MDR-3” qulaqlığını yenidən satışa çıxarıb. “MDR-3R” adlanan model klassik görünüşünü qoruyur, amma müasir cihazlara USB-C ilə qoşulur. Standart versiya 59,99 dollara (təxminən 102 manat) satılır. Qulaqlığı adi mağazalardan da almaq olar.

    Yeni qulaqlığın görünüşü orijinal modelə mümkün qədər yaxın hazırlanıb. Standart versiyada mavi və narıncı qulaq yastıqları var. Qutunun və istifadə təlimatının dizaynında da 1979-cu ilin modelinə istinad edilib. Korpus təkrar emal olunmuş plastikdən hazırlanıb, simsiz qoşulma imkanı yoxdur.

    Qulaqlıqda orijinal modeldəki kimi 23 mm-lik səs ötürücüləri - drayverlər var. “Sony” onları köhnə modelə yaxın, eyni zamanda müasir tələblərə uyğun səs verməsi üçün yenidən hazırlayıb. Sınaq zamanı orta və yüksək tezliklər aydın səslənir, sağ və sol kanalların ayrılması da qənaətbəxşdir. Bas eşidilir, amma böyük və bahalı qulaqlıqlardakı qədər güclü deyil.

    “MDR-3R” qulağın ətrafını tam örtmür, birbaşa qulağın üzərində dayanır. Buna görə istifadəçi ətrafdakı səsləri eşidir, qulaqlıqdan gələn musiqi də kənara çıxa bilir. Belə quruluş küçədə, metroda və hava limanında ətrafdan xəbərdar qalmağa kömək edir. Ancaq səs-küylü mühitdən təcrid olunmaq istəyənlər üçün uyğun deyil.

    Kabeldə telefon zəngləri üçün mikrofon, səs səviyyəsi düymələri və musiqini dayandıran idarəetmə hissəsi var. Mikrofon danışığı ötürür, amma otaqdakı klaviatura və musiqi kimi fon səslərini də qarşı tərəfə çatdırır. Nazik plastik başlıq, metal tənzimləmə hissələri və hərəkətli qulaq bölmələri bir qədər kövrək görünür. Bununla belə, qulaqlıq çox yüngüldür və uzun müddət rahat taxılır.

    “Sony” “Netflix”in “Stranger Things” serialına həsr olunmuş xüsusi versiya da hazırlayıb. Modeldə Max obrazının taxdığı qulaqlığa uyğun qara və qırmızı yastıqlar var. Başlıqda serialın loqosu yerləşdirilib. Texniki göstəricilər standart versiya ilə eynidir. Xüsusi model 79,99 dollara (təxminən 136 manat) satılır və artıq satışdadır.