Sony Xperia 1 VII flaqman smartfonu təqdim olunub - QİYMƏTİ

     Sony şirkəti Xperia smartfon seriyasının yeni flaqman modelini təqdim edib. Söhbət, Sony Xperia 1 VII-dən gedir. Bu yeni smartfon xarici görünüşcə daha öncəki Xperia smartfonlarından heç də fərqlənmir. Sony Xperia 1 VII smartfonu 1 Hz-dən 120 Hz-ə qədər təsvir yenilənməsinə sahib Full HD+ keyfiyyətli 6.5 düym ölçülü OLED ekranla təchiz olunub. Ekran Gorilla Glass Victus 2 qoruyucu şüşəsi ilə əhatə olunub. Barmaq izi skanı texnologiyası yandırıb/söndürmə düyməsinə inteqrasiya edilib. Bununla yanaşı smartfonun gövdəsi IP65/68 standartları üzrə tozdan və sudan qorunma özəlliyinə sahibdir.

     Smartfon Snapdragon 8 Elite prosessoru vasitəsilə çalışır və 12 GB RAM ilə 256 GB (2 TB-a kimi microSD dəstəkli) daxili yaddaş həcmini əldə edib. Sony Xperia smartfonlarının ənənəvi güclü tərəfi hər zaman kameraları olub. Sony Xperia 1 VII də əvvəlki model kimi arxa paneldə üç kameralı sistemlə təchiz olunub, lakin bu sistem yenilənmiş formada təqdim olunur. Burada yenə də 48 MP-lik, 1/1.35 düym-lük Exmor T sensoru olan əsas kamera yer alır. Kamera Zeiss optikası, 24-48 mm fokus məsafəsi, OIS (optik stabilizasiya) + EIS (elektron stabilizasiya) ikili stabilizasiya sistemi və f/1.9 diafraqma ilə təchiz olunub.

     Bundan əlavə, 12 MP-lik periskop tipli telefoto kamera da mövcuddur. O, Exmor RS sensoru (optik format - 1/3.5 düym), 85-170 mm fokus məsafəsi və 3.5-7.1 qat optik zoom imkanına malikdir. Əsas yenilik isə 1/1.56 düym ölçüsündə, 48 MP-lik geniş bucaqlı (104 dərəcə bucaq əhatəsi) və f/2.0 diafraqmalı sensordur. Bu sensor əvvəlki modellə müqayisədə 2.1 dəfə daha böyükdür. Ön kamera isə 12 MP-likdir. Smartfon AI Camera Work adlı yeni funksiya ilə təchiz olunub. Bu funksiya obyekti hərəkət zamanı belə kompozisiyanın mərkəzində saxlayaraq, peşəkar səviyyəli sabit və düzgün kadrlaşdırılmış videolar yaratmağa kömək edir.

     Digər bir funksiya isə Auto Framing adlanır. O, süni zəkadan istifadə edərək obyektin hərəkətini izləyir və onu avtomatik şəkildə kadra salaraq mərkəzə yerləşdirir. Hərəkətdə olan obyektin çəkilişi zamanı sadəcə kameranı hədəfə yönəltmək kifayətdir. Batareya mövzusuna gəldikdə, Sony Xperia 1 VII smartfonu 30 vatt gücündə sürətli şarj texnologiyalı 5000 mAh enerji tutumlu batareya ilə təchiz olunub. Smartfon qutudan Android 15 vasitəsilə çalışır. Sony bildirib ki, Sony Xperia 1 VII 4 il ərzində Android dəstəyini və 6 il ərzində təhlükəsizlik dəstəyini əldə edəcək. Sony Xperia 1 VII artıq gələn ay satışa çıxacaq və onun qiyməti 1499 avro təşkil edəcək.

Mənbə: GSMarena