SpaceX-in ikinci Starship V3 buraxılışı son anda avtomatik dayandırıldı

    SpaceX-in təkmilləşdirilmiş Starship V3 raket sisteminin ikinci sınaq buraxılışı ABŞ-nin Texas ştatındakı Starbase kompleksində mühərriklərin işə salınmasından dərhal sonra avtomatik olaraq ləğv edilib.

   Elon Musk X sosial şəbəkəsində bildirib ki, bəzi Raptor mühərrikləri işə düşmədiyi üçün avtomatik təhlükəsizlik sistemi buraxılışı dayandırıb. Onun sözlərinə görə, iki mühərrik dəyişdiriləcək və növbəti buraxılış cəhdi gələn həftə həyata keçiriləcək.

    Bu missiyanın əsas məqsədi üçüncü nəsil Starlink peyklərinin ilk dəfə orbitə göndərilməsi idi. Lakin Starship hələ Yer orbitinə tam çıxma qabiliyyətini sübut etmədiyi üçün peyklərin yerləşdirildikdən təxminən 20 dəqiqə sonra atmosferdə yanaraq məhv olması planlaşdırılırdı.

   Bu, həmçinin SpaceX-in iyunun 12-də tarixdə ən böyük IPO-lardan biri ilə birjaya çıxmasından sonra Starship proqramı çərçivəsində ilk buraxılış cəhdi idi. Şirkət IPO zamanı 85 milyard dollardan çox vəsait cəlb etsə də, son bir ay ərzində səhmlərinin qiyməti tədricən ucuzlaşıb. Cümə axşamı ticarət sessiyasını IPO qiymətindən aşağı başa vuran SpaceX səhmləri uğursuz buraxılış cəhdindən sonra əlavə olaraq 4 %-dən çox dəyər itirib.

    SpaceX bu sınaqla may ayında baş tutan ilk Starship V3 missiyasından sonra uçuşları bərpa etməyi planlaşdırırdı. Həmin missiyada raketin buraxılışı uğurlu olsa da, Super Heavy gücləndiricisi planlaşdırılan enişdən əvvəl nasazlıq yaşamış və ABŞ Federal Aviasiya Administrasiyası (FAA) araşdırma başladmışdı. Agentlik bu həftənin əvvəlində problemlərin səbəbləri və aradan qaldırılması tədbirləri müəyyən edildikdən sonra SpaceX-ə yenidən uçuş icazəsi vermişdi.

     May missiyası zamanı Starship-in yuxarı pilləsində də bir mühərrik sıradan çıxsa da, aparat Starlink simulyatorlarını buraxmağı və planlaşdırılan su üzərinə eniş manevrini uğurla yerinə yetirməyi bacarmışdı.

    Son buraxılış cəhdi zamanı geri sayım demək olar ki, problemsiz davam edib. T-1 dəqiqədə qısa fasilədən sonra sayım bərpa olunub, start meydançasının su soyutma sistemi işə düşüb və Super Heavy gücləndiricisinin mühərrikləri alışmağa başlayıb. Lakin bir neçə saniyə sonra bütün sistem avtomatik söndürülüb. SpaceX-in canlı yayımındakı göstəricilər dörd yeni nəsil Raptor mühərrikinin alışmadığını göstərib.

    Hazırda SpaceX raketin hər iki pilləsindən yanacağı boşaltmalı və nasazlığın dəqiq səbəbini araşdırmalıdır.