Tecno-dan neon işıqlı konsept telefon

    Technote.az "The Verge” platformasına istinadən bildirir ki, Mobil Dünya Konqresi çərçivəsində innovativ konseptləri ilə diqqət çəkən Tecno bu dəfə iki fərqli dizayn yanaşmasını nümayiş etdirib. Şirkət maqnitli modul telefon konseptindən sonra indi də rəng dəyişən və neon işıqlı iki yeni model ideyasını təqdim edib.

    Ən çox diqqət çəkən model Pova Neon olub. Şirkətin açıqlamasına görə, bu cihaz sadəcə parlaq rənglərdən istifadə etmir. Burada real neon işıqlandırma texnologiyası tətbiq edilib. Tecno bildirir ki, telefonun arxa hissəsində “ionlaşdırılmış inert qaz işıqlandırma texnologiyası” istifadə olunur. Bu texnologiya nəticəsində cihazın arxa paneli sözün əsl mənasında parlayır və neon effekti yaradır.

    Digər konsept isə AI EInk adlanır. Bu modelin arxa panelində elektron mürəkkəb (E Ink) texnologiyası yerləşdirilib. Bunun sayəsində istifadəçi telefonun rəngini istədiyi zaman dəyişə bilər. Ən maraqlı xüsusiyyət isə rəng seçiminin kamera vasitəsilə edilməsi imkanıdır. Yəni bir şəkil çəkərək telefonun arxa panelini geyiminizə və ya ətraf mühitə uyğun rəngə salmaq mümkündür. Hazırda hər iki model konsept mərhələsindədir və onların kommersiya versiyasının təqdim olunacağına dair rəsmi məlumat yoxdur.