Uber Eats sifarişlərini dronlarla çatdırmağa başlayacaq

    Uber yemək və məhsul çatdırılması xidməti Uber Eats-də dronlardan daha geniş istifadə etmək üçün Zipline şirkəti ilə tərəfdaşlıq qurub. Uber eyni zamanda dron çatdırılması üzrə ixtisaslaşan Zipline-a investisiya yatıracaq. Şirkətlərin açıqlamasına görə, Zipline dronları ilə ilk Uber Eats sifarişlərinin çatdırılmasına 2026-cı ilin sonuna qədər başlanacaq. İlk mərhələdə xidmət Zipline-ın artıq fəaliyyət göstərdiyi ərazilərdə əlçatan olacaq. Daha sonra isə dron çatdırılmasının ABŞ-nin onlarla şəhərinə genişləndirilməsi planlaşdırılır.

    Uber və Zipline qarşılarına kifayət qədər böyük hədəf qoyublar. Şirkətlər 2029-cu ilin sonuna qədər Zipline dronları vasitəsilə gündə 1 milyon çatdırılma həyata keçirməyi planlaşdırırlar. Uber-in Zipline-a yatıracağı investisiyanın məbləği isə açıqlanmayıb. Uber hesab edir ki, Zipline dronları Uber Eats sifarişlərini təxminən 5-10 dəqiqə ərzində müştərilərə çatdıra bilər. Uber CEO-su Dara Xosrovşahinin sözlərinə görə, sürətli çatdırılma bazarı şirkət üçün böyük inkişaf imkanları yaradır və gələcəkdə Uber Eats-in böyüməsinin əsas istiqamətlərindən birinə çevrilə bilər.

    Bu, Uber-in dron çatdırılması sahəsində ilk tərəfdaşlığı deyil. Şirkət daha əvvəl İsrailin Flytrex startapı ilə də əməkdaşlığa başlamışdı. Uber ümumilikdə avtonom nəqliyyat texnologiyalarında öz sistemlərini sıfırdan qurmaq əvəzinə, müxtəlif şirkətlərin texnologiyalarını öz platformasına inteqrasiya etmək strategiyasından istifadə edir. San-Fransiskoda yerləşən Zipline isə dron çatdırılması bazarının ən böyük şirkətlərindən biridir. Startap son investisiya raundunda 800 milyon dollar cəlb edib və nəticədə onun bazar dəyəri 7,6 milyard dollara yüksəlib.