Windows 11 iyun yeniləməsi sürəti və təhlükəsizliyi ciddi şəkildə artırdı

    Microsoft Windows 11 üçün yayımladığı iyun yeniləməsi ilə əməliyyat sisteminin performansını artıran və təhlükəsizliyini gücləndirən bir sıra yeniliklər təqdim edib. KB5094126 nömrəli yeniləmə istifadəçi təcrübəsini yaxşılaşdırmaqla yanaşı, 200-dən çox təhlükəsizlik boşluğunu da aradan qaldırır. Yeniləmənin ən diqqətçəkən xüsusiyyətlərindən biri yeni "aşağı gecikmə" (low-latency) profilidir. Bu funksiya istifadəçi Başlat menyusu, Axtarış və ya Bildiriş Mərkəzi kimi sistem elementlərini açdıqda prosessorun qısa müddət ərzində maksimum tezlikdə işləməsini təmin edir. Nəticədə həmin bölmələr və tətbiqlər daha sürətli açılır və sistem daha çevik reaksiya verir.

    Microsoft son aylarda Başlat menyusunda həyata keçirdiyi optimallaşdırmaları bu yeniliklə tamamlayır. Şirkətin bildirdiyinə görə, gələcək versiyalarda istifadəçilər Başlat menyusunun bütün bölmələrini istədikləri kimi əlavə edib silə biləcəklər. İyun yeniləməsi Windows Search funksiyasını da sürətləndirir. Artıq istifadəçi cəmi iki simvol yazdıqdan sonra axtarış nəticələri göstərilməyə başlayır ki, bu da proqramları klaviatura vasitəsilə açan istifadəçilər üçün vaxt qazandırır.

    Bundan əlavə, Microsoft Store üzərindən tətbiqlərin və sistem komponentlərinin yüklənməsi və yenilənməsi prosesi də optimallaşdırılıb. Əvvəllər müşahidə olunan yavaşlıq problemi əhəmiyyətli dərəcədə azaldılıb. Yeni funksiyalar arasında eyni kameradan bir neçə tətbiqin istifadə edə bilməsi, iki Bluetooth LE qulaqcığa eyni anda səs ötürülməsi (Shared Audio), Windows quraşdırılarkən istifadəçi qovluğunun adını sərbəst seçmək imkanı və NPU (AI prosessoru) üçün Task Manager monitorinq alətləri də yer alır.

    Ümumilikdə, iyun yeniləməsi Windows 11-in gündəlik istifadədə daha sürətli işləməsinə, proqramların daha operativ açılmasına və sistemin daha təhlükəsiz olmasına yönəlmiş ən əhatəli yeniləmələrdən biri hesab olunur.