Xbox 25 illiyini xüsusi şəffaf yaşıl Series X ilə qeyd edir

    Microsoft Xbox brendinin 25 illik yubileyi münasibətilə məhdud sayda istehsal olunacaq xüsusi Xbox Series X konsolunu və simsiz oyun idarəetmə cihazını təqdim edib. Yeni kolleksiya bu ilin noyabr ayında satışa çıxarılacaq. "Xbox Series X25 Limited Edition" adlanan konsol şəffaf yaşıl rəng dizaynı ilə hazırlanıb və ilk nəsil Xbox konsoluna vizual olaraq istinad edir. Şirkət bildirir ki, bu, Xbox Series X modelində istifadə olunan ilk şəffaf korpus dizaynıdır.

    Yeni model texniki baxımdan standart Xbox Series X ilə eyni xüsusiyyətlərə malikdir. Konsol 1 TB daxili yaddaşla təchiz olunub və mövcud Xbox Series X-in bütün performans imkanlarını qoruyub saxlayır. Dizaynda isə orijinal Xbox-un simvolik yaşıl rəngi, yaşıl işıqlanan "X" düyməsi və digər nostalji elementlər diqqət çəkir. Kolleksiyaya daxil olan "Xbox Wireless Controller X25 Special Edition" idarəetmə cihazı da xüsusi dizayna malikdir. Kontrollerdə ilk Xbox dövrünü xatırladan klassik ABXY düymə rəngləri istifadə olunub. Microsoft əlavə olaraq cihazlarda istifadəçilər üçün bəzi gizli sürprizlərin də yer aldığını açıqlayıb. İstifadəçilər yeni konsolu və kontrolleri birlikdə əldə edə biləcəklər. Eyni zamanda, yalnız xüsusi buraxılış kontrollerini ayrıca satın almaq da mümkün olacaq.