Xbox achievement sistemi yenilənir

    Technote.az “Engadget” platformasına istinadən bildirir ki, Microsoft Xbox istifadəçiləri üçün yeni bir funksiyanı test etməyə başlayıb. Şirkət artıq oyunçulara “achievement” siyahısında hansı oyunların görünüb-görünməyəcəyinə nəzarət imkanı təqdim etməyə hazırlaşır.

    Yeni funksiya hazırda Xbox Insiders Program çərçivəsində sınaqdan keçirilir. Aprel ayından etibarən bəzi istifadəçilər istədikləri oyunları achievement siyahısından gizlədə biləcəklər. Maraqlıdır ki, gizlədilən oyunlar profilinizdə görünməsə də, onların qazandırdığı ümumi Gamerscore balına təsiri qalacaq. Bununla yanaşı, Microsoft achievement sistemində vizual yeniliklər də edir. Yenilənmiş dizayn, daha müasir animasiyalar və istifadəçinin seçdiyi interfeys rənginə uyğun bildirişlər təqdim olunacaq. Həmçinin, 100 % tamamlanmış oyunlar siyahıda xüsusi olaraq vurğulanacaq və istifadəçilər yalnız tam bitirdikləri oyunlara görə filtr tətbiq edə biləcəklər.

    Şirkət bildirir ki, oyunları achievement siyahısından gizlətmək funksiyası istifadəçilər tərəfindən ən çox tələb olunan yeniliklərdən biri idi. Bu dəyişikliklər Xbox platformasının istifadəçi təcrübəsini daha fərdiləşdirilmiş və çevik etmək məqsədi daşıyır.