Xbox Elite Series 3 prototipi sızdı

    Microsoft-un yeni Xbox Elite Series 3 kontrollerinin prototipinə aid olduğu iddia edilən fotolar Reddit-də yayılıb. Maraqlısı isə odur ki, görüntülərdəki cihazın üzərində daha əvvəlki sızıntılarda görünməyən kiçik daxili ekran yer alır. Reddit istifadəçisinin sözlərinə görə, o, prototip kontrolleri OfferUp-da 200 dollara alıb. Fotolarda cihazın ekranında Xbox Series X və xCloud-u xatırladan ikonlar görünür. Ekranın müxtəlif məlumatları göstərə bildiyi, hətta Microsoft-un bulud resurslarından birinə yönləndirən URL-i əks etdirdiyi bildirilir.

    Bu, Elite Series 3 haqqında ilk sızıntı deyil. May ayında Braziliyada yayılan tənzimləyici sənədlərə əsaslanan görüntülərdə kontrollerin alt hissəsində iki yeni sürüşdürmə çarxının, Xbox Cloud Gaming serverlərinə birbaşa qoşulmaq üçün əlavə simsiz bağlantı rejiminin və konsol ilə bulud serverləri arasında keçid etməyə imkan verən yeni Pair düyməsinin olacağı ortaya çıxmışdı. Yeni fotolarda Pair düyməsinin məhz daxili ekranın yanında yerləşdiyi görünür.

    Prototipdə həmçinin dörd arxa düymə, yeni sürüşdürmə çarxları, dəyişdirilə bilən D-pad və batareya bölməsi görünür. Tətiklər isə hair-trigger rejiminə keçirildikdə klik səsi çıxaracaq şəkildə hazırlanıb. Daha diqqətçəkən detallardan biri kontrollerin təmirə daha uyğun dizayn edilə biləcəyini göstərir. Batareya bölməsindəki QR kodun ehtimal ki, təmir təlimatlarının yerləşdiyi veb-səhifəyə yönləndirmək üçün nəzərdə tutulduğu, korpusda isə asanlıqla açılmağa imkan verən Torx T6 vintlərindən istifadə edildiyi görünür.

    Bununla belə, cihazın işlək vəziyyətdə olmadığı bildirilir. Reddit istifadəçisi kontrollerin nə Xbox-a, nə də kabel vasitəsilə qoşulduğunu, yalnız qırmızı işığın yanıb-söndüyünü qeyd edib. Üstəlik, cihazın üzərində “NOT FOR SALE” yazısı və müxtəlif tənzimləyici qurumlar üçün placeholder identifikasiya nömrələri var. Bu da onun satış üçün hazırlanmış son məhsul deyil, prototip olduğunu göstərir.