Xbox xidmətlərində genişmiqyaslı problem yaranıb

    Microsoft-un Xbox platformasında genişmiqyaslı texniki problem yaranıb. Nasazlıq səbəbindən dünyanın müxtəlif ölkələrində istifadəçilər hesablarına daxil olmaqda, oyunları işə salmaqda və Xbox Store-dan istifadə etməkdə çətinliklərlə üzləşiblər. Şirkətin rəsmi status səhifəsinə əsasən, problem Xbox Series X/S, Xbox One və Xbox 360 konsollarını əhatə edir. İstifadəçilər hesablarına daxil ola, yaxud daxil olduqdan sonra gözlənilmədən sistemdən çıxarıla bilirlər. Buna görə də giriş tələb edən əksər oyunlar, tətbiqlər və sosial funksiyalar müvəqqəti olaraq əlçatmaz vəziyyətə düşüb.

    Maraqlı məqamlardan biri isə nasazlığın yalnız rəqəmsal oyunlara deyil, fiziki disk vasitəsilə işlədilən oyunlara da təsir etməsidir. Microsoft bildirib ki, bəzi istifadəçilər diskdən istifadə etsələr belə, oyunları işə salmaqda problemlə qarşılaşa bilərlər. Bundan əlavə, Xbox Store-da oyunların axtarışı və tətbiqlərin açılması da bir sıra istifadəçilər üçün mümkün olmayıb.