Biraz əvvəl biz, Xiaomi 13T smartfonunun texniki göstəriciləri və Avropa bazarındakı qiyməti barəsində xəbər verdik. İndi isə internetdə Xiaomi 13T Pro modelinin texniki göstəriciləri ilə Avropa bazarındakı qiyməti ortaya çıxıblar. Beləliklə ortaya çıxmış məlumata əsasən Xiaomi 13T Pro modeli adi Xiaomi 13T kimi 144 Hz-lik təsvir yenilənməsinə sahib AMOLED ekranla təchiz olunacaq. Lakin Xiaomi 13T-nin MediaTek Dimensity 8200 Ultra prosessoru vasitəsilə çalışacağı halda Xiaomi 13T Pro modeli Dimensity 9200+ prosessorunu əldə edəcək.

    Bununla yanaşı Pro model özündə 12 GB RAM-ı, 512 GB daxili yaddaş həcmini və 120 vatt gücündə sürətli şarj texnologiyalı 5000 mAh enerji tutumlu batareyanı birləşdirəcək. Kameralara gəldikdə isə smartfon 50 MP + 50 MP + 12 MP üçlü arxa kameraya və 12 MP-lik ön kameraya sahib olacaq. Məlumatda qeyd edilib ki, Xiaomi 13T Pro smartfonu Avropa bazarında 900 avro qiymətində satışa çıxacaq. Qeyd etmək lazımdır ki, Xiaomi 13T smartfon seriyası 26 sentyabr tarixində təqdim ediləcək.