Çin avtomobil qapı tutacaqları üçün yeni qayda tərtib edib
Technote.az “The Verge” platformasına istinadən bildirir ki, Çin hökuməti avtomobil təhlükəsizliyi ilə bağlı mühüm qərar qəbul edib. Geri çəkilən (pop-out / flush) avtomobil qapı tutacaqları qadağan olunur. Yeni qaydalara əsasən, 2027-ci ildən etibarən bazara çıxan bütün yeni avtomobil modelləri, 2029-cu ildən isə artıq satışda olan modellər bu dizayndan imtina etməli olacaq.
Son illər bu tip qapı tutacaqları xüsusilə elektromobillərdə geniş yayılıb. Dizaynerlər onları minimalist görünüşə, mühəndislər isə aerodinamik üstünlüklərə görə seçirdi. Məsələn, Tesla Model S modeli həm dizayn, həm də enerji səmərəliliyi baxımından bu yanaşmanın simvoluna çevrilmişdi. Lakin təhlükəsizlik tərəfi ciddi suallar doğururdu.
Əsas problem ondan ibarətdir ki, qəza zamanı avtomobilin 12V elektrik sistemi sıradan çıxarsa, bu cür qapılar kənardan açıla bilmir. Xüsusilə Tesla modellərində bu səbəbdən ən azı 15 ölüm halı qeydə alınıb. Bu faktlar ABŞ-də araşdırmalara səbəb olsa da, Çin daha sərt və qabaqlayıcı addım atıb.
Yeni qaydalar olduqca detallıdır. 2027-ci ildən sonra təqdim edilən bütün yeni modellərdə:
- Əlin rahat girə bilməsi üçün ən azı 6 sm enində, 2 sm hündürlüyündə və 25 mm dərinliyində boşluq olmalıdır;
- Qapılar yarı-flush və ya klassik mexaniki tutacaqlarla açılmalıdır;
- Qəza, hava yastığının açılması və ya batareya yanğını zamanı zərbə almayan tərəfdəki qapılar alətsiz açılmalıdır;
- Salon daxilində isə qapıların intuitiv mexaniki açma mexanizmi mütləq olmalıdır.
Bu dəyişikliklər təkcə Tesla ilə məhdudlaşmır. Çinin ən populyar elektromobil istehsalçıları olan Xiaomi, Nio, Li Auto və Xpeng, eləcə də beynəlxalq brendlərdən BMW bəzi modellərini yenidən dizayn etməli olacaq. Hətta Ferrari və McLaren kimi superkar istehsalçılarının belə Çin bazarı üçün qapı dizaynını dəyişməsi gözlənilir.
Paylaş
Bənzər xəbərlər
