Çin ilk dəfə Level-3 avtonom elektromobillərə rəsmi icazə verdi

    Technote.az “Engadget” platformasına istinadən bildirir ki, Çin elektromobillər və avtonom sürüş texnologiyaları sahəsində növbəti mühüm addımını atıb. Ölkənin Sənaye və İnformasiya Texnologiyaları Nazirliyi (MIIT) ilk dəfə olaraq Level-3 (3-cü səviyyə) avtonom idarəetmə imkanına malik avtomobillərə rəsmi icazə verib. Təsdiqlənən iki elektrik sedan dövlətə məxsus avtomobil istehsalçıları olan Changan Auto və BAIC Motor tərəfindən hazırlanıb.

    ABŞ Milli Avtomobil Yolları Təhlükəsizliyi Administrasiyasının (NHTSA) tərifinə görə, Level-3 avtonom sürüş zamanı avtomobil bütün idarəetmə funksiyalarını özü həyata keçirir. Lakin sistem ehtiyac yarandıqda sürücüdən idarəetməni yenidən üzərinə götürməsini tələb edə bilər və sürücü buna hazır olmalıdır. MIIT-in açıqlamasına əsasən, Changan markalı elektromobil tıxac şəraitində həm magistral yollarda, həm də şəhər sürətli yollarında bir zolaq daxilində avtonom şəkildə hərəkət edə bilir. Bu imkan yalnız Chongqing şəhərinin müəyyən ərazilərində və maksimum 50 km/saat sürətlə məhdudlaşdırılıb. BAIC-in elektrik sedanı isə eyni tip yollarda Pekinin müəyyən hissələrində avtonom rejimdə işləyə bilir və maksimal sürəti 80 km/saatdır.

    Nazirlik bildirib ki, hər iki avtomobil üçün ilkin baxış, seçim, sınaq və təhlükəsizlik qiymətləndirmələri mövcud standartlara uyğun şəkildə aparılıb və uğurla tamamlanıb. Bununla belə, avtomobillərin bazara çıxarılacağı tarix hələlik açıqlanmayıb.