Çində avtomobil satışları son illərin ən zəif göstəricisini nümayiş etdirib

    Çində avtomobil bazarı 2026-cı ilin ilk yarısında ciddi geriləmə ilə üzləşib. Çin Minik Avtomobilləri Assosiasiyasının (CPCA) məlumatına görə, ölkədə minik avtomobillərinin satışı ötən ilin eyni dövrü ilə müqayisədə 20,2 % azalaraq 8,7 milyon ədədə düşüb. Qurum ilin sonu üzrə proqnozunu da aşağı salıb. Belə ki, 2026-cı ildə ümumi satışların 20,4 milyon avtomobil olacağı gözlənilir. Bu isə 2025-ci ildə qeydə alınmış 23,7 milyonluq rekord göstəricidən xeyli aşağıdır. Ən böyük eniş daxili yanma mühərrikli avtomobillərdə müşahidə olunur. İyun ayında benzin və dizel mühərrikli avtomobillərin pərakəndə satışı illik müqayisədə 39 %, yalnız benzin mühərrikli modellərdə isə 42 % azalıb. Analitiklər bunu yanacağın bahalaşması və istehlakçıların elektromobillərə keçidi ilə əlaqələndirirlər.

    Bununla yanaşı, elektrik avtomobilləri bazarı da əvvəlki illərdəki yüksək artım tempini qoruyub saxlaya bilmir. Mütəxəssislər hesab edirlər ki, dövlət subsidiyalarının azaldılması nəticəsində 2026-cı ildə yeni enerji avtomobillərinin satışında da 5-6 % geriləmə müşahidə oluna bilər. İstehsalçılar eyni zamanda artan xammal xərcləri və qiymət müharibəsi ilə üzləşirlər. Litium və yaddaş çiplərinin bahalaşması fonunda avtomobil istehsalçılarının mənfəət marjası ilin ilk beş ayında 3,4 %-ə qədər enib, sektorun ümumi mənfəəti isə 20 % azalıb. Analitiklərin fikrincə, bir avtomobil istehsalçısının zərər etməməsi üçün ildə ən azı 500 min, dayanıqlı mənfəət əldə etməsi üçün isə 1 milyon avtomobil satması lazımdır. Bu səbəbdən 2030-cu ilə qədər Çin bazarında yalnız 7-8 böyük istehsalçının fəaliyyətini davam etdirəcəyi proqnozlaşdırılır. Potensial liderlər arasında BYD, Geely, Leapmotor, eləcə də Volkswagen və Toyota göstərilir.