FTC-dən sərt qərar: General Motors sürücü məlumatlarını paylaşa bilməyəcək

    ABŞ-nin Federal Trade Commission (FTC) qurumu sürücülərin şəxsi məlumatlarının paylaşılması ilə bağlı qalmaqaldan sonra General Motors (GM) üçün ciddi məhdudiyyətlər tətbiq edib. TechCrunch-ın məlumatına görə, FTC ötən ilki sazişi yekunlaşdıraraq GM-in müəyyən istifadəçi məlumatlarını üçüncü tərəflərlə paylaşmasını qadağan edib.

    Qalmaqal iki il əvvəl The New York Times tərəfindən dərc olunan araşdırmadan sonra üzə çıxmışdı. Məlum olmuşdu ki, GM-in OnStar “Smart Driver” proqramı sürücülərin dəqiq geolokasiya məlumatlarını və sürücülük davranışlarını toplayaraq məlumat brokerlərinə ötürüb. Bu məlumatlar daha sonra sığorta şirkətlərinə satılıb və bəzi sürücülərin sığorta haqları ciddi şəkildə artırılıb. Məsələn, Chevrolet Bolt sahibi olan bir sürücünün sığorta ödənişi bu məlumatlara əsasən 21 faiz yüksəlib.

    FTC ilə razılaşmaya əsasən, GM beş il müddətində sürücülərə aid konkret məlumatları istehlakçı hesabat agentlikləri ilə paylaşa bilməz. Bundan əlavə, şirkət avtomobil məlumatlarını toplamazdan, istifadə etməzdən və ya üçüncü tərəflərə ötürməzdən əvvəl istifadəçilərdən açıq və aydın razılıq almalıdır. Bu razılıq avtomobilin diler mərkəzindən alındığı anda, müştəri ilə üzbəüz şəkildə soruşulmalıdır. Qeyd edək ki, GM artıq 2024-cü ilin aprelində “Smart Driver” proqramını bütün brendlər üzrə dayandırıb. Şirkət həmçinin LexisNexis və Verisk kimi məlumat brokerləri ilə əməkdaşlığı kəsib.