GM elektromobil batareyalarını 2 dəfə tez hazırlayacaq mərkəz qurur

    “GM” Miçiqan ştatının Uorren şəhərində elektromobil batareyaları üçün yeni Batareya Elementlərinin İnkişafı Mərkəzi qurur. Süni intellekt modelləri və kiçik istehsal xətti yeni batareya elementlərinin hazırlanma müddətini təxminən 2 dəfə azaltmalıdır. Məqsəd xərcləri aşağı salmaq və daha sərfəli elektromobillərin satışını artırmaqdır.

    Yanaşı 2 binada qurulan mərkəzin ümumi sahəsi təxminən 46 500 kvadratmetrdir. Layihənin dəyəri 900 milyon dollardır (təxminən 1,53 milyard manat). Mərkəzin maksimum gücü 4 - 5 giqavatt-saat olacaq. Ancaq burada əsas məqsəd kütləvi istehsal deyil. Obyektdə hər gün minlərlə sınaq elementi hazırlanacaq və istehsal üsulları təkmilləşdiriləcək.

    Mərkəzdə ilk olaraq litium və manqanla zəngin prizmatik elementlər hazırlanacaq. Sınaq məhsullarının 2026-cı ilin son rübündə buraxılması planlaşdırılır. Bu elementlərdə kobalt və nikeldən çox az istifadə olunur. Kütləvi istehsalın 2028-ci ildə başlaması gözlənilir. Daha sonra “Peak Energy” ilə enerji saxlama sistemləri üçün hazırlanan natrium-ionlu prizmatik elementlər sınaqdan keçiriləcək.

    Mərkəz laboratoriya sınaqları ilə kütləvi istehsal arasındakı mərhələni sürətləndirəcək. “Kettering” laboratoriyası batareyanın kimyəvi tərkibini tək element üzərində yoxlayır. 2023-cü ildə açılan “Wallace” mərkəzində böyük elementlərdən kiçik partiyalar hazırlanır. Yeni obyektdə qarışığın həcmi 40 litrdən ən azı 1500 litrədək artırılacaq. Bu göstərici 2000 litrə çata bilər və istehsal prosesi real zavod avadanlığında sınaqdan keçiriləcək.

    Fiziki istehsala başlamazdan əvvəl rəqəmsal əkizlərdən, yəni məhsulun virtual modelindən yararlanılır. Bu modellər elementin kimyəvi tərkibini, elektrodları, batareya paketini və bütöv elektromobili sınaqdan keçirir. Son 10 ilin batareya məlumatları ilə öyrədilən süni intellekt kobaltın azaldılması və silisiumun artırılması kimi dəyişikliklərin nəticəsini bir neçə günə hesablayır. Bu üsulla keyfiyyət aşağı düşmədən qarışdırma vaxtı yarıya endirilib.

    “GM” bütün hazırlıq prosesinin təxminən 2 dəfə tez başa çatacağını gözləyir. Şirkətin hesablamasına görə, perspektivli batareya tərkiblərinin bazara çıxışı 1 ilədək sürətlənə bilər. Hazır dizaynlar daha sonra “Ultium Cells”, “LG Energy Solution” və digər tərəfdaşların iri zavodlarına göndəriləcək. Batareya paketi elektromobilin ümumi qiymətinin 30 - 40%-idir. Buna görə batareyanın ucuzlaşdırılması daha sərfəli elektromobillərin hazırlanmasında əsas rol oynayır.