Honda ABŞ-də istehsala az qalmış üç elektrik avtomobil layihəsini ləğv etdi

    Technote.az “Engadget” platformasına istinadən bildirir ki, Honda ABŞ-də istehsala başlamağa bir neçə ay qalmış üç elektrik avtomobil modelinin hazırlanmasını dayandırdığını açıqlayıb. Şirkətin Ohayo ştatındakı EV Hub zavodunda istehsal olunması planlaşdırılan Honda 0 SUV, Honda 0 Sedan və Acura RSX modelləri artıq layihədən çıxarılıb.

     Bu avtomobillər ilk dəfə CES 2025 sərgisində demək olar ki, istehsala hazır formada təqdim edilmişdi və Honda-nın tamamilə öz platforması olan Zero üzərində qurulan ilk daxili elektrik modelləri olacaqdı. Daha əvvəl təqdim olunan Honda Prologue və Acura ZDX modellərindən fərqli olaraq, yeni layihələr başqa şirkətin texnologiyasına deyil, Honda-nın öz mühəndisliyinə əsaslanırdı.

     Şirkət qərarın əsas səbəbləri kimi ABŞ-də elektrik avtomobilləri üçün federal vergi güzəştlərinin ləğvini, fosil yanacaq qaydalarının yumşaldılmasını və tətbiq edilən tarifləri göstərib. Honda bildirib ki, bu dəyişikliklər nəticəsində ölkədə elektrik avtomobillərinə tələbat zəifləyib.

     Honda prezidenti Toshihiro Mibe mətbuat konfransında qeyd edib ki, bazardakı dəyişikliklər elektrik avtomobillərinin gəlirli istehsalını “çox çətin” hala gətirib. Şirkət həmçinin Çində proqram təminatına əsaslanan və daha sürətli istehsal dövrünə malik yeni istehsalçılarla rəqabətdə geri qaldığını etiraf edib.

     Yeni strategiyaya əsasən Honda resurslarını növbəti nəsil hibrid avtomobillərə yönəldəcək və yalnız bazar tələbi kifayət qədər artdıqda yeni elektrik modellərini satışa çıxaracaq. Şirkət eyni zamanda hibrid bazarının sürətlə böyüyəcəyi gözlənilən Hindistanda fəaliyyətini genişləndirməyi planlaşdırır.