KHOU 11 Houston xəbər verir ki, Texasda Tesla Cybertruck yoldan çıxaraq suötürücü boruya çırpılıb və alovlanaraq sürücünün ölümü ilə nəticələnib. Reuters-in məlumatına görə, bu qəza Tesla-nın yeni elektrik yük maşını ilə bağlı ilk ölüm hadisəsi kimi qeydə alınıb və NHTSA (Milli Avtomobil Yolları Nəqliyyatı Təhlükəsizliyi İdarəsi) tərəfindən araşdırmaya səbəb olub. Sürücünün kimliyi isə hələlik müəyyən edilməyib. Qəzaya nəyin səbəb olduğu bəlli deyil, lakin bunun Tesla-nın Avtopilotu ilə əlaqəli olmadığı düşünülür, çünki Cybertruck, hələ bu xüsusiyyəti əldə etməmişdir. Texas ştatı polisi, hadisə yerindən çəkilmiş videogörüntülərdə avtomobilin demək olar ki, yanğın nəticəsində tamamilə məhv olduğunu, bunun da avtomobilin və sürücünün şəxsiyyətini müəyyənləşdirməyi çətinləşdirdiyini bildirib.

     İlk bildirilən Cybertruck qəzası keçən ilin sonlarında Palo Alto yaxınlığında baş vermiş, qəzada heç bir xəsarət alan olmamış və minimal ziyanla nəticələnmişdi. İndiyədək təxminən 15.000 avtomobil satılıb, buna görə də son vaxtlar qəza xəbərlərinin sayı artıb. Daha öncələr Tesla, qaz pedalının yapışmasına səbəb ola biləcək bir problemlə əlaqədar, avtomobillərini dörd dəfə geri çağırış etmişdi.

     Cybertruck, 2023-cü ilin noyabr ayında istifadəyə verildiyi gündən bəri keyfiyyətsiz istehsalı, nasazlıqlar, uşaqlar və digərləri üçün təhlükəli hesab edilən "gilyotin" korpus panelləri kimi qəribə dizayn qərarlarına görə tənqid olunur. Cybertruck, həmçinin asanlıqla ilişib qaldığına və yolsuzluqda yaxşı performans göstərmədiyinə görə, bir çox tənqidlərlə də üzləşmişdi.