Kirayə platforması Turo sürücüyə yardım sistemli Tesla-ları göstərəcək

    “Turo” avtomobil kirayəsi platforması “Tesla”nın FSD sürücüyə yardım sistemi aktiv olan avtomobilləri elanlarda ayrıca göstərəcək. Bununla daha çox sürücü “Full Self-Driving (Supervised)” sistemini sınaqdan keçirə biləcək. FSD sürücülük işlərinin çoxunu görsə də, sükan arxasındakı şəxs daim yola nəzarət etməlidir.

    Avtomobilini platformada kirayəyə verən uyğun sahiblər FSD-ni 1 ay pulsuz sınaqdan keçirəcəklər. “Turo” funksiyanın aktiv olub-olmadığını “Tesla”nın API məlumatları ilə yoxlayacaq. Yəni elandakı məlumat yalnız avtomobil sahibinin dediklərinə əsaslanmayacaq. Təsdiqlənmiş məlumat avtomobil seçən istifadəçiyə göstəriləcək.

    “Tesla”nın rəqəmlərinə görə, dünyada təxminən 1,7 milyon müştəri FSD üçün ödəniş edib. Şirkətin indiyədək istehsal edərək satdığı avtomobillərin sayı 10 milyonu keçib. Şimali Amerikada ilin 3-cü rübündə avtomobilini təhvil alanların 75 faizdən çoxu FSD abunəsinə pul ödəyib. Bu göstərici əvvəlki rübdən təxminən 20 faiz çoxdur.

    FSD seçimi “Turo”da onsuz da çox tələb görən “Tesla” avtomobillərinin kirayəsini artıra bilər. Bu il platformanın ən populyar avtomobilləri siyahısında “Model 3” 3-cü, “Model Y” 4-cü yerdədir. “Turo”nun araşdırmasına qatılan amerikalıların 55 faizi səyahət zamanı sürücüsüz texnologiya ilə maraqlandığını deyib. Z nəsli arasında bu göstərici 71 faizə çatır.

    FSD aktiv olan “Tesla” avtomobilini kirayələyənlərə təhlükəsizlik xəbərdarlığı göstəriləcək. Onlar sistemin işini izləməli və istənilən an idarəetməni ələ almağa hazır olmalıdırlar. İstifadəçilər “Tesla”nın hazırladığı təlimata da baxa biləcəklər. Avtomobil sahibləri uyğun elanlarda maşını “Self-Driving” ifadəsi ilə göstərə biləcəklər.