Polestar 2028-ə qədər 4 yeni elektrik avtomobil təqdim edəcəkl

    Technote.az “Mashable” platformasına istinadən bildirir ki, isveç mənşəli elektrik avtomobil istehsalçısı Polestar 2028-ci ilə qədər dörd yeni model təqdim edəcəyini açıqlayıb.

    Planın ilk addımı Polestar 5 olacaq. Yüksək performanslı elektrik sedan ilk dəfə ötən il elan edilmişdi və 2026-cı ilin yayından etibarən müştərilərə çatdırılmağa başlanacaq. Model premium seqmentdə Tesla və digər elektrik sedanlarla rəqabət aparmağı hədəfləyir.

    Daha sonra 2026-cı ilin son rübündə yenilənmiş Polestar 4 satışa çıxarılacaq. Elektrik SUV seqmentində yerləşən bu model həm dizayn, həm də texnologiya baxımından təkmilləşdirilmiş versiya ilə bazara qayıdacaq.

    Şirkətin ən tanınmış modellərindən biri olan Polestar 2 isə 2027-ci ilin əvvəlində yenilənmiş formada təqdim ediləcək. Kompakt elektrik sedan olaraq bu model daha geniş auditoriyaya xitab edir və markanın satış həcminin əsas hissəsini təşkil edir.

    Planın son mərhələsində, 2028-ci ildə tamamilə yeni Polestar 7 təqdim ediləcək. Bu model “kompakt premium SUV” olaraq təsvir olunur və şəhər istifadəsinə uyğun, lakin yüksək səviyyəli texnologiya və dizayn elementləri ilə seçiləcək. Polestar-ın bu strategiyası şirkətin elektrik avtomobil bazarında payını artırmaq və model xəttini daha da genişləndirmək məqsədi daşıyır. Artan rəqabət fonunda bu addım markanın qlobal mövqeyini gücləndirməyə yönəlib.