Sony Honda Mobility Afeela Prototype 2026-nı təqdim etdi

    Technote.az “Engadget” platformasına istinadən bildirir ki, Sony Honda Mobility CES 2026 sərgisində Afeela Prototype 2026 adlı yeni konsept avtomobilini təqdim edib. Bu model ötən ildən tanıdığımız Afeela 1 sedanın SUV üslubuna uyğunlaşdırılmış, daha hündür və iri versiyasıdır.

    Əslində yeni prototip dizayn baxımından böyük sürpriz vəd etmir. Avtomobil Afeela 1-in minimalist dizayn xəttini qoruyur: ön hissədə yerləşdirilən LCD panel, hamar kuzov xətləri və futuristik üslub burada da saxlanılıb. Şirkət avtomobilin istehsal tarixini “2028-ci ildən tez olmamaq şərti ilə” kimi açıqlayır ki, bu da real olaraq 2029-cu il ehtimalını gücləndirir. Bu arada Afeela 1 sedanı ilə bağlı planlarda ciddi dəyişiklik yoxdur. Şirkətin ABŞ üzrə prezidenti və CEO-su Şuqu Yamaquçi bildirib ki, avtomobil hələ də 2026-cı ilin sonuna doğru satışa çıxarılacaq. Start qiyməti 89 900 dollar, maksimum yürüş məsafəsi isə 300 mil (təxminən 483 km) olaraq qalır. Model Honda-nın Ohayo ştatındakı zavodunda istehsal ediləcək. Lakin bu texniki göstəricilər artıq ABŞ bazarı üçün bir qədər zəif görünür. Xüsusilə bu qiymət aralığında təklif olunan elektromobillərlə, o cümlədən Porsche Taycan kimi modellərlə müqayisədə 300 millik yürüş məsafəsi kifayət qədər rəqabətli sayılmır.

    Sony Honda Mobility isə bu çatışmazlığı texnologiya ilə kompensasiya etməyə çalışır. Afeela 1, GM Super Cruise-a bənzər şəkildə əllər sərbəst, gözlər yolda prinsipi ilə işləyən inkişaf etmiş sürücü yardım sistemi ilə satışa çıxacaq. Gələcəkdə OTA (over-the-air) yeniləmələr vasitəsilə Level 4 avtonom sürüş dəstəyi də planlaşdırılır. Bu sistem LIDAR sensoru daxil olmaqla çoxsaylı sensorlara əsaslanacaq.