Tesla 1,5 milyon istifadəçiyə 40 günlük pulsuz FSD sınağı təqdim edir

    Technote.az "Mashable" platformasına istinadən bildirir ki, Tesla ilin sonuna doğru gözlənilməz bir hədiyyə ilə çıxış edib. Şirkət ABŞ-də HW4 avadanlığına sahib təxminən 1.5 milyon Tesla sahibi üçün Full Self-Driving (FSD) proqramının ən son versiyasını, FSD V14-ü 40 günlük pulsuz sınaq müddəti ilə aktivləşdirib. Sınaq dövrü 8 yanvara qədər davam edəcək.

    FSD avtomobilin avtonom idarəetməyə daha da yaxınlaşmasını təmin edən bir sıra qabaqcıl sürücü-assistent funksiyalarından ibarətdir. Bunlara avtomatik zolaq dəyişmə, avtomatik parketmə və marşrut boyunca naviqasiya daxildir. Bununla belə, sistem hələ də sürücüdən daimi nəzarət tələb edir. Tesla-nın bu addımı həm mövsümi jest, həm də ağıllı marketinq strategiyası kimi qiymətləndirilir. Şirkət istifadəçilərin FSD-nin yeni versiyasını sınaqdan keçirərək ona alışacağını və sınaq müddətindən sonra satın almağa maraq göstərəcəyini düşünür.

    Qeyd edək ki, FSD texnologiyası problemlərdən tam azad deyil. Elon Musk hər yeni versiyanın “tam avtonomluğa ən yaxın addım” olduğunu deyir, lakin inkişaf gözlənildiyi qədər sürətli getmir.