Tesla ABŞ-də nəzarətsiz robotaksi sınaqlarına başladı

    Technote.az “The Verge” platformasına istinadən bildirir ki, Tesla ilk dəfə olaraq ABŞ-nin Texas ştatının Austin şəhərində tam nəzarətsiz robotaksi səfərlərinə başladığını göstərən video yayımlayıb. Video X platformasında paylaşılıb və Elon Musk tərəfindən repost edilərək şirkətin süni intellekt komandasına təbrik ünvanlanıb.

    Son aylara qədər Tesla-nın Austin və San-Fransiskodakı robotaksi avtomobillərində təhlükəsizlik məqsədilə insan monitorlar mövcud idi. Bu şəxslər fövqəladə vəziyyətdə sistemi dayandırmaq üçün “kill switch”ə çıxışa malik idilər. Austin-də monitor sərnişin oturacağında, San-Fransisko-da isə sürücü yerində əyləşirdi. Xidmət hələ də tam açıq deyil və yalnız gözləmə siyahısı üzərindən məhdud istifadəçilərə təqdim olunur.

    Elon Musk daha əvvəl bildirmişdi ki, bu monitorlar texnologiyanın zəifliyinə görə yox, sadəcə “həddindən artıq ehtiyatlılıq” səbəbindən saxlanılır. O, təhlükəsizlik nəzarətçilərinin 2025-ci ilin sonuna qədər tamamilə çıxarılacağını proqnozlaşdırmışdı. Lakin görünür, bu proses gözləniləndən daha tez başlayıb.