Tesla Cybercab Giga Texas-da real sınaqlara başladı

    Tesla tam sükan və pedal olmadan hazırladığı Cybercab robotaksilərinin sınaqlarını yeni mərhələyə keçirib. Şirkət X sosial şəbəkəsində paylaşdığı videoda Cybercab modelinin Texas ştatındakı Giga Texas zavodunda əməkdaşları daşıdığını nümayiş etdirib. Videoda görünən avtomobil Tesla-nın təqdim etdiyi Cybercab konseptinə tam uyğundur. Avtomobil "kəpənək" tipli qapılarla təchiz edilib, sükan və pedallar yoxdur, həmçinin salonda təhlükəsizlik sürücüsü də görünmür.

    Bu addım Cybercab layihəsinin inkişafında mühüm mərhələ hesab olunsa da, xidmət hələ kommersiya istifadəsinə hazır deyil. Hazırda məlum olmayan əsas məqam isə robotaksilərin zavodun bütün ərazisində hərəkət edib-etməyəcəyi və ya yalnız parkinq ətrafında qısa marşrut üzrə fəaliyyət göstərəcəyidir. Hazırda Texasın Ostin şəhərində Tesla-nın robotaksi xidməti üçün Model Y avtomobillərindən istifadə olunur. Bu mərhələ Cybercab-a keçid prosesi kimi qiymətləndirilir.