Tesla Cybercab-ın salonu sərgilənib (VİDEO)
Tesla şirkəti oktyabr ayında Cybercab adlı pilotsuz taksini təqdim etdi. İndi isə Elon Musk özünün X (keçmiş Twitter) hesabında bu pilotsuz taksinin salonunu sərgiləyən videonu bölüşüb. Məlum olub ki, Tesla Cybercab-ı buna bənzər digər nəqliyyat növlərindən fərqləndirən əsas özəllik ondadır ki, o, idarəetmə sisteminə sahib deyil. Yəni Cybercab-da sükan ilə pedallar yoxdur. Videodan da göründüyü kimi pilotsuz taksinin salonu minimalistik tərzdə hazırlanıb. O özündə iki nəfər sərnişin üçün nəzərdə tutulmuş oturacaqları və mərkəzi hissədə sensorlu ekranı birləşdirir. Sensorlu ekran sayəsində sərnişinlər təyinat nöqtəsini qeyd edə biləcəklər. Qeyd etmək lazımdır ki, Cybercab-ın kütləvi istehsalına 2026-cı ildə start verilməsi planlaşdırılır. Bununla belə Musk bildirib ki, kütləvi istehsal prosesi 2027-ci ilə qədər gecikə bilər. Qeyd etmək lazımdır ki, Tesla bu pilotsuz taksi nəqliyyatının texniki imkanlarını hələ açıqlamayıb.
Paylaş
