Uber-in yeni robotaksi tərəfdaşı Waabi oldu

    Technote.az “The Verge” platformasına istinadən bildirir ki, Toronto mərkəzli avtonom yük maşını startapı Waabi fəaliyyət sahəsini genişləndirərək robotaksi bazarına daxil olur. Şirkət bu istiqamətdə dünyanın ən böyük ride-sharing platformalarından biri olan Uber ilə əməkdaşlığa başlayıb.

    Waabi 2021-ci ildə Uber-in bağlanmış Advanced Technologies Group bölməsinin keçmiş baş elmi rəhbəri Raquel Urtasun tərəfindən yaradılıb. Şirkət indiyə qədər əsasən ABŞ-nin Texas ştatında kommersiya marşrutları üzrə özünü idarə edən yük maşınları üzərində çalışırdı. Lakin avtonom yük maşınlarının bazara çıxarılmasının gözlənildiyindən daha çətin olması və robotaksilərə marağın artması Waabi-ni strategiyasını dəyişməyə vadar edib.

    Bu məqsədlə Waabi ümumilikdə 1 milyard dollar investisiya cəlb edib. Bunun 750 milyon dolları Khosla Ventures və G2 Venture Partners-in rəhbərlik etdiyi Series C investisiya raunduna aiddir. Bundan əlavə, Uber robotaksi layihəsi üçün ayrıca maliyyə ayırıb. Razılaşmaya əsasən, Waabi texnologiyası ilə təchiz edilmiş ən azı 25 min robotaksinin Uber platformasında istifadəyə verilməsi planlaşdırılır. Raquel Urtasun bildirib ki, bu rəqəm minimum göstəricidir və gələcəkdə daha da arta bilər. O, Waabi-nin yük maşınları üçün hazırladığı texnologiyanın robotaksilərdə də tətbiq oluna biləcəyini vurğulayıb. Onun sözlərinə görə, yüklərin yüklənməsi və boşaldılması üçün dəqiq nöqtələrə hərəkət etmək, sərnişinlərin götürülməsi və düşürülməsi ilə funksional baxımdan oxşardır.

    Bununla belə, Waabi hələlik robotaksilərin hansı tarixdə, hansı ölkə və şəhərlərdə, eləcə də hansı avtomobil platforması üzərində istifadəyə veriləcəyini açıqlamayıb. Şirkət həmçinin robotaksi parkının sahibinin kim olacağı barədə də məlumat paylaşmayıb.