Uber lüks səyahət bazarını gücləndirmək üçün Blacklane-i satın alır

    Technote.az “Engadget” platformasına istinadən bildirir ki, Uber lüks nəqliyyat sahəsində mövqeyini gücləndirmək məqsədilə Berlində yerləşən sürücülü avtomobil sifarişi platforması Blacklane-i satın aldığını açıqlayıb. 2011-ci ildə təsis edilən Blacklane müstəqil sürücü xidmətləri ilə premium xidmət axtaran müştərilər arasında vasitəçi rolunu oynayır.

    Şirkətin bildirdiyinə görə, bu razılaşma hələ tənzimləyici qurumların təsdiqindən keçməlidir və 2026-cı ilin sonuna qədər tamamlanması gözlənilir. Satınalma məbləği açıqlanmayıb.

    Blacklane hazırda 60-dan çox ölkədə 500-dən artıq şəhərdə fəaliyyət göstərir. Platforma yalnız sifarişlə sürücülü avtomobil xidməti deyil, həm də şəhərlərarası səfərlər, uçuş izləmə ilə hava limanı transferləri və saatlıq icarə kimi xidmətlər təklif edir.