Uber robotaksi şirkətlərinə pulsuz yol məlumatı verəcək

    Technote.az “TechCrunch” platformasına istinadən bildirir ki, Uber avtonom nəqliyyat texnologiyalarına yönəlik yeni AV Labs adlı bölmə yaratdığını elan edib. Bu bölmənin əsas məqsədi robotaksi üzərində çalışan şirkətlər üçün real yol şəraitində sürücülük məlumatları toplamaqdır.

    Hazırda Uber-in 20-dən çox avtonom avtomobil partnyoru var və onların hamısı eyni resursa ehtiyac duyur: məlumat. Uber bildirir ki, AV Labs vasitəsilə bu məlumatları partnyorlarla paylaşacaq. Şirkət vurğulayır ki, bu addım Uber-in yenidən öz robotaksisini inkişaf etdirməsi demək deyil. Xatırladaq ki, Uber 2018-ci ildə baş verən qəza sonrası bu sahədən geri çəkilmiş və 2020-ci ildə avtonom bölməsini Aurora-ya satmışdı. Yeni bölmə çərçivəsində Uber müxtəlif şəhərlərdə sensorlarla təchiz olunmuş avtomobilləri yollara çıxaracaq. Bu avtomobillər lidar, radar və kameralar vasitəsilə real sürücülük ssenarilərini qeydə alacaq. Toplanan məlumatlar Waymo, Waabi və Lucid Motors kimi partnyorların avtonom sistemlərini təkmilləşdirməyə kömək edəcək.

    Son illər avtonom nəqliyyat sektorunda qayda əsaslı sistemlərdən süni intellekt və reinforcement learning yanaşmasına keçid sürətlənib. Bu isə real yol məlumatlarını xüsusilə dəyərli edib. Şirkətlər simulyasiyalardan istifadə etsələr də, real küçələrdə baş verən gözlənilməz vəziyyətləri yalnız canlı sürüşlər zamanı aşkar etmək mümkündür.