Volkswagen və Uber birgə pilotsuz taksi xidmətini yaradırlar

     Volkswagen və Uber ABŞ-da pilotsuz taksi xidmətinin yaradılması üzrə genişmiqyaslı tərəfdaşlıq elan ediblər. İlk Volkswagen ID. Buzz robotaksiləri artıq 2026-cı ildə Los-Ancelesdə sərnişin daşımağa başlayacaq, lakin sükan arxasında ehtiyat məqsədilə operatorlar olacaq. 2027-ci ilə qədər bu avtomobillərin tam avtonom rejimdə işləməsi planlaşdırılır. TechCrunch-ın məlumatına görə, bu xidmətin qarşıdakı 10 il ərzində ABŞ-ın bir neçə şəhərində istifadəyə verilməsi planlaşdırılır, lakin ilkin mərhələdə layihə yalnız Los-Ancelesdə işə salınacaq. Əvvəlcə mikroavtobusların salonunda təhlükəsizlik operatorları olacaq, lakin artıq 1 il sonra Uber və Volkswagen tam pilotsuz daşımalara keçməyi planlaşdırırlar.

     Volkswagen nümayəndələrinin sözlərinə görə, bu müddət ərzində bütün lazımi icazələrin tənzimləyici orqanlardan alınması mümkündür. Volkswagen-in avtonom texnologiyalarına cavabdeh olan törəmə şirkəti - ADMT, bu il Kaliforniyada yerli Nəqliyyat Vasitələri Departamentindən təsdiq aldıqdan sonra sınaqlara başlayacaq. Kommersiya məqsədli fəaliyyət üçün icazələri ştatın Kommunal Xidmətlər Komissiyası verəcək ki, bu da Volkswagen üçün mühüm addımdır. Xüsusilə Argo AI layihəsinin bağlanmasından və Mobileye ilə əməkdaşlığa yönəldikdən sonra bu, şirkət üçün yeni mərhələdir.

     Volkswagen-in Avtonom Mobillik bölməsinin rəhbəri Christian Senger bəyan edib ki, Volkswagen təkcə avtomobil istehsalçısı deyil, həm də “mobilliyin gələcəyidir”. “Bizim üstünlüyümüz kütləvi istehsal, qabaqcıl texnologiyalar və şəhər nəqliyyatının ehtiyaclarını anlamağın vəhdətindədir. Uber ilə tərəfdaşlıq bu prosesi daha da sürətləndirəcək” - deyə o vurğulayıb. Baxmayaraq ki, Volkswagen daha əvvəl öz taksi xidmətini inkişaf etdirməyi planlaşdırmadığını bildirmişdi, şirkət ID. Buzz pilotsuz mikroavtobuslarının və avtoparkın idarə olunması üçün proqram təminatının satışında perspektivlər görür.

     Uber ilə əməkdaşlıq bu strategiyanı təsdiqləyir. Qeyd edək ki, Uber üçün bu, avtonom nəqliyyat sahəsində ilk tərəfdaşlıq deyil. Volkswagen ABŞ-dan olan 14-dən çox şirkəti ilə, o cümlədən Alphabet-in törəmə şirkəti olan Waymo ilə fəal əməkdaşlıq edir. Waymo ilə Ostində robotaksi xidməti artıq işə salınıb və yaxın vaxtlarda Atlantada da başlanması planlaşdırılır. Mütəxəssislərin fikrincə, Volkswagen və Uber ittifaqı tənzimləyici maneələrə və texnoloji çağırışlara baxmayaraq, ABŞ-da pilotsuz daşımalar bazarında əsas oyunçulardan birinə çevrilə bilər.

Mənbə: Techcrunch