Apple 28 illik rəsmi dəstək forumunu həmişəlik bağlayacaq

    “Apple” rəsmi “Apple Support Community” forumunu 20 noyabr 2026-cı ildə həmişəlik bağlayacaq. Platforma artıq yalnız oxu rejiminə keçirilib. Buna görə yeni paylaşım yazmaq və əvvəlki mövzulara cavab vermək olmur. 28 illik forumda istifadəçilər “iPhone”, “Mac” və digər “Apple” məhsulları ilə bağlı problemləri müzakirə edirdilər.

    Forum 1998-ci ildən fəaliyyət göstərirdi və əvvəlcə “Apple Tech Exchange” adlanırdı. Sonrakı illərdə platformanın adı bir neçə dəfə dəyişib. O, bir müddət “Apple Discussions” kimi də tanınıb. Sayt bağlandıqdan sonra istifadəçilərin 28 il ərzində topladığı texniki məlumatların aqibəti bəlli deyil.

    “Apple Support Community” texniki problemlər və funksiyalarla bağlı axtarışlarda çox vaxt ilk nəticələr arasında görünürdü. Təcrübəli istifadəçilər burada başqalarına məsləhət verir, bəzən “Apple” nümayəndələri də həll yolları göstərirdi. Forum bağlandıqdan sonra istifadəçilər rəsmi “Apple Support” saytındakı təlimat və dəstək materiallarına yönləndiriləcək.

    Şirkət strategiya və müştəri ehtiyaclarını qiymətləndirib və forumu bağlamaq qərarına gəlib. “Apple” bu addımı əvvəlcədən ayrıca açıqlamayıb. Onilliklər ərzində yazılmış mövzuların sonradan açıq qalıb-qalmayacağı barədə də məlumat verilməyib. Buna görə köhnə paylaşımlar 20 noyabrdan sonra tamamilə silinə bilər.

    Qərar istifadəçilər arasında fərqli qarşılanıb. Bəziləri forumda çoxlu faydalı cavab və köhnə həll yolu olduğunu vurğulayıb. Digərləri platformada tez-tez yararsız cavablarla qarşılaşdıqlarını yazıblar. Rəsmi forum bağlandıqdan sonra istifadəçilər məsləhət almaq üçün sosial mediaya və başqa onlayn icmalara üz tutmalı olacaqlar.