Apple ilk iPod-un 25 illiyi üçün virtual musiqi pleyeri hazırladı

    “Apple” ilk “iPod” modelinin 25 illiyi münasibətilə “Apple Music” saytında onun gizli virtual versiyasını hazırlayıb. Tam işlək musiqi pleyerini istifadəçilər 23 oktyabrda aşkar ediblər. Pleyer saytda mövcud olmayan istənilən səhifə açıldıqda, yəni 404 xətası çıxanda görünür. Bunun üçün əsas ünvanın sonuna təsadüfi hərflər yazmaq kifayətdir.

    Virtual “iPod” siçan, trekpad və toxunma ekranı ilə idarə olunur. Orijinal modeldə olduğu kimi, dairəvi idarəetmə hissəsindən mahnı seçmək və səsləndirmək olur. Kataloqda XXI əsrin əvvəllərindən mahnılar, o cümlədən “Coldplay” qrupunun “Viva La Vida” və “Gorillaz” qrupunun “Feel Good Inc.” mahnıları var. Ancaq seçilən mahnılar tam səslənmir və 1 dəqiqədən bir qədər çox davam edir.

    “Apple” orijinal “iPod” modelini 23 oktyabr 2001-ci ildə 399 dollara (təxminən 680 manat) satışa çıxarmışdı. Steve Jobs cihazı bütöv musiqi arxivini cibdə gəzdirmək üçün məhsul kimi tanıtmışdı. 5 GB yaddaşa 1000 mahnı sığırdı. Pleyer MP3, WAV və AIFF formatlarını oxuyurdu. Həmin dövrdə bu həcm əksər insanların bütün rəqəmsal musiqi kolleksiyasına bərabər sayılırdı.

    İlk “iPod”un eni təxminən 6,1 sm, hündürlüyü 10,2 sm idi. Qalınlığı 2 sm olan cihaz 184 qram çəkirdi. İçində diametri 4,6 sm olan “Toshiba” sərt diski vardı. FireWire 400 bağlantısı ilə cihazı həm doldurmaq, həm də faylları sürətlə köçürmək olurdu.

    1 CD-dəki mahnılar “iPod”a 5 - 10 saniyəyə köçürülürdü. 1000 mahnının köçürülməsi təxminən 10 dəqiqə çəkirdi. O dövrün USB pleyerlərində eyni işlər 5 dəqiqəyə və 5 saata başa gəlirdi.

    Batareya fasiləsiz 10 saat musiqi səsləndirirdi və 1 saata 80 faiz dolurdu. Mexaniki sürüşdürmə çarxı mahnıları ifaçıya, siyahıya və adına görə tez tapmağa kömək edirdi. “iTunes 2” proqramı “Mac” kompüterindəki musiqi kitabxanasını qoşulan pleyerə avtomatik köçürür və hər iki cihazda eyni saxlayırdı. “iPod” xarici FireWire sərt diski kimi də işləyirdi.

    “iPod” xətti təxminən 20 il “Apple”ın əsas məhsullarından biri olub. İlk “iPhone” 2007-ci ilin əvvəlində satışa çıxsa da, hər iki cihaz 10 ildən çox yanaşı satılıb. Son “iPod Touch” 2019-cu ilin mayında çıxıb, məhsul xəttinin satışı 2022-ci ilin mayında dayandırılıb. İndi “Apple Music” 100 milyon mahnıya ani giriş verir. Virtual pleyer isə ilk “iPod”un sadə idarəetməsini brauzerdə yenidən göstərir.