Apple-ın Siri AI köməkçisində sürət və sabitlik problemləri yaranıb

    “Apple” sentyabr ayında “iOS 27” daxilində yeni “Siri AI” köməkçisini çıxarıb. Xidmət gözləmə siyahısı ilə tədricən açılır və hələ beta mərhələsindədir. Yenilənmiş köməkçi mesaj və qeydlərdə məlumat axtara, ekrandakı məzmunu başa düşə və suallara daha ətraflı cavab verə bilir. Ancaq ilk istifadəçilər sürət və sabitliklə bağlı ciddi problemlərdən şikayətlənirlər.

    Şikayətlərin bir hissəsi internet bağlantısı ilə bağlıdır. Köməkçi bəzən sorğulara xəta mesajı ilə cavab verir. VPN-i söndürmək və ya Wi-Fi parametrlərini dəyişmək problemi həll edə bilər, amma interfeys xətanın səbəbini göstərmir. Digər problem telefonun məlumatları axtarış üçün düzgün hazırlamamasıdır. Buna görə “Siri AI” alış-veriş siyahısını, qurulmuş zəngli saatları və bəzi “HomeKit” cihazlarını tapa bilmir.

    Yeni köməkçi bir çox əmri yalnız “iPhone” kiliddən çıxarılandan sonra yerinə yetirir. Parametrlərdə kilidli ekranda “Siri” istifadəsinə icazə verilsə də, problem qalır. Şəxsi məlumatları tapmaq üçün telefonun axtarış bazasına baxan əmrlər kilidli cihazda nəticə vermir. Nəticədə avtomobildə və ya “AirPods” ilə mesaj göndərmək kimi sadə tapşırıqlar əvvəlki versiya ilə müqayisədə çətinləşib.

    İstifadəçilərin sözlərinə görə, “Siri AI” sorğulara əvvəlkindən gec cavab verir. Hesablamaların bir hissəsi telefonda aparılır, əsas işi isə “Private Cloud Compute” adlı bulud sistemi görür. İnternet zəif olduqda mesaj göndərmək və bildirişləri yoxlamaq kimi sadə əmrlər də ləngiyir. “Apple Watch Series 9” və sonrakı modellərdə 5 dəqiqəlik taymerin başladılması belə bir neçə saniyə çəkə bilər.

    Köhnə “Siri”də olan bəzi funksiyalar yeni sistemdə hələ yoxdur. Məsələn, köməkçi hazırda “Health” tətbiqində saxlanılan sağlamlıq məlumatları ilə bağlı sualları cavablandırmır. Əmri “Use ChatGPT” ifadəsi ilə başlatmaq da sorğunu əvvəlki kimi birbaşa “ChatGPT” xidmətinə göndərmir. Bundan başqa, istifadəçilərin öyrəşdiyi bəzi dəqiq ifadələr yeni köməkçi tərəfindən səhv başa düşülür.

    İnterfeysdəki dəyişikliklər də narazılıq doğurub. Əməliyyat sisteminin müxtəlif bölmələrinə nəzərəçarpan “Ask Siri” düymələri əlavə olunub, amma “Dynamic Island”da istifadəçinin dedikləri mətn kimi görünmür. Bəzi hallarda ekranın ortasından aşağı sürüşdürəndə bildirişlər əvəzinə “Siri & Spotlight” bölməsi açılır. “Apple” problemlərin düzəldiləcəyini desə də, oktyabrda əlavə dillərin açılmasından başqa plan açıqlamayıb.

    Problemlə üzləşənlər klassik “Siri” versiyasına qayıda bilərlər. Bunun üçün “Settings” tətbiqində əvvəlcə “Screen Time”, sonra “Content & Privacy Restrictions” və “Siri” bölmələrini açmaq lazımdır. Ardınca “Allowed Siri version” seçimində “Siri AI (Beta)” əvəzinə “Siri Classic” seçilməlidir. Digər yol “Siri”ni tam söndürüb yenidən aktivləşdirmək və quraşdırma zamanı istənilən versiyanı seçməkdir.