Apple visionOS-in smart eynək üçün olan versiyasını hazırlayır

     Technote.az MacRumors saytına istinadən bildirir ki, Apple şirkəti Apple Vision Pro üçün nəzərdə tutulmuş əməliyyat sistemi olan visionOS-in smart eynəklər üçün nəzərdə tutulmuş versiyası üzərində çalışır. Bu addım, şirkətin artırılmış reallıq (AR) məhsul xəttini daha geniş auditoriyaya çatdırmaq və daha cəlbedici hala gətirmək səylərinin bir hissəsidir.

     Bloomberg saytının məşhur insayderi Mark Gurman-ın məlumatına görə, Vision Pro indiyə qədər gözlənilən uğuru əldə edə bilməyib. Bir çox istifadəçi 3500$ dəyərində olan bu cihazı uzun müddət istifadə üçün çox ağır, bahalı və həddindən artıq qızmağa meyilli hesab edir. Bu isə öz növbəsində onu müəyyən bir istifadəçi qrupunda məhdudlaşdırır. Cihazın satışları Apple şirkətinin gözləntilərini qarşılamayıb və ona olan maraq azalır.

     Gurman bildirir ki, Apple-ın şirkəti Vision Pro-dan kənara nəzər yetirərək, Meta-nın Ray-Ban ilə əməkdaşlığı çərçivəsində satılan smart eynəyə bənzər cihazını təqdim etməyi düşünür. Bu istiqamətdə çalışan şirkət mütəxəssisləri, belə bir məhsulun üç ildən tez hazır olmayacağını və hələ çox araşdırma aparılmalı olduğunu qeyd edirlər.

     Bu məqsədlə, şirkət hazırda ofislərində "funksiyaların və interfeyslərin cəlbediciliyini qiymətləndirmək" üçün istifadəçi tədqiqatları aparır və artıq öz potensial smart eynəyində çalışacaq visionOS versiyası üzərində işlər görür. "Atlas" kod adı ilə tanınan bu tədqiqatlar, Apple şirkətinin hardware engineering şöbəsinin bir hissəsi olan məhsul sistemləri keyfiyyəti komandası tərəfindən idarə olunur.

     İşlər, şirkətin kupertino-dakı əsas mərkəzindən bir şəhər aralıda yerləşən Santa Klara-da gizli bir müəssisədə davam edir. Apple, keçən il bu məkanda bəzi işçiləri işdən çıxardı, qalan heyət isə AR texnologiyası üzərində işləməyə davam edir. Şirkətin burada potensial smart eynəyin ekranlarını sınaqdan keçirmək üçün bir istehsal müəssisəsi də var.