Brandon Thomas Microsoft Office-ə 3 açıq mənbəli alternativ təqdim etdi

    “ArtCraft” layihəsinin yaradıcısı Brandon Thomas “Microsoft Office” paketindəki əsas proqramlara açıq mənbəli alternativlər hazırladığını açıqlayıb. O, “Excel”, “PowerPoint” və “Word”u əvəz etmək üçün “GridCraft”, “DeckCraft” və “WordCraft” tətbiqlərini təqdim edib. Proqramların hazırlanmasında “Claude” süni intellekt modelindən yararlanıb.

    Thomas 15 illik təcrübəsi olan proqram mühəndisidir. O, daha əvvəl “Adobe” proqramlarına pulsuz alternativ kimi “ArtCraft” alətlər paketini yaradıb. Layihə populyarlaşdıqdan sonra proqramların süni intellektlə keyfiyyətsiz hazırlandığına dair tənqidlər səslənib. Tərtibatçı kod yazmağı bacardığını, süni intellekt modellərinin isə bütöv bir şirkətin işini tək görməsinə kömək etdiyini deyib.

    Yeni tətbiqlər “Microsoft Office”in abunə sisteminə açıq mənbəli alternativdir. “Google Sheets”, “Google Docs” və “Google Slides” brauzerdə pulsuz işləyir, lakin onlara yalnız internet üzərindən daxil olmaq olur. Buna görə istifadəçinin proqram üzərində nəzarəti məhdud qalır. Açıq mənbəli proqramlarda kod hamı üçün açıqdır və istifadəçilər xidmətin gələcəkdə ödənişli olmasından asılı qalmırlar.

    Layihənin əsas üstünlüklərindən biri müxtəlif əməliyyat sistemlərində işləməsidir. “Adobe” proqramları “Windows” və “macOS”da işləyir. “Linux”da istifadə üçün əlavə uyğunlaşdırma alətləri və “Windows”u təqlid edən proqramlar lazımdır. “ArtCraft” alətləri hər 3 sistemdə işləmək və oxşar görünüşlü interfeys göstərmək üçün hazırlanır.

    “ArtCraft”ın sürətlə böyüyən icması yeni proqramlarla bağlı təkliflər də verir. 3D çap və mühəndisliklə maraqlanan istifadəçilər “Autodesk” məhsullarına alternativ olaraq “CADcraft” adlı alətin hazırlanmasını istəyirlər. Bununla belə, hazırkı tətbiqlərin çoxu əvəz etməyə çalışdığı peşəkar proqramlardan hələ xeyli geri qalır.