Linux nüvəsinin yığılması yeni düzəlişlərlə 22 saniyədən 15-ə enib

    “Linux” nüvəsinin sıfırdan yığılması yaxın vaxtlarda 10 saniyədən az çəkə bilər. Yeni proqram düzəlişləri güclü sınaq kompüterində bu müddəti 22 saniyədən 15 saniyəyə endirib. Beləliklə, proses təxminən 32 faiz sürətlənib. Burada güclü prosessorlarla yanaşı, kodun insanlar və süni intellektlə təkmilləşdirilməsi də rol oynayıb.

    Sınaqda x86-64 sistemləri üçün minimal standart nüvə ayarları seçilib. Yaddaş idarəetməsi üzrə tərtibatçı Lorenzo Stoakes süni intellekt və böyük dil modellərinin köməyi ilə “Kbuild” kodunu ləngidən bir neçə problemi aradan qaldırıb. Son düzəlişlərdən sonra nüvənin yığılması 15 saniyəyə tamamlanıb. Dəyişikliklər daha zəif prosessorlarda da bu müddəti nəzərəçarpacaq dərəcədə azaldıb.

    Sınaq kompüterində 2 ədəd 64 nüvəli “AMD EPYC 9575F” prosessoru olub. Sistem ümumilikdə 128 nüvə və 256 hesablama axını ilə işləyib. Yaddaş üçün 24 ədəd DDR5-6400 modulu qoyulub. Hər modulun tutumu 64 GB-dır. Fayllar “Samsung PM1743” SSD-də saxlanılıb. Diskin tutumu 3,84 TB-dır və o, PCIe 5.0 bağlantısı ilə işləyib. Kompüterdə standart “Ubuntu 26.04 LTS” qurulub. Nəticəni süni şəkildə yaxşılaşdıra bilən RAMdisk-dən istifadə edilməyib.

    Daha ağır “allmodconfig” rejimində minlərlə drayver və alt sistem işə salınır. Buna görə nüvənin yığılması minimal ayarlarla müqayisədə xeyli uzun çəkir. Yeni düzəlişlər bu müddəti 169 saniyədən 134 saniyəyə endirib. Beləliklə, tam yığılma prosesi 2 dəqiqə 14 saniyəyə qədər qısalıb.

    Növbəti hədəf minimal nüvə yığılmasını 10 saniyədən aşağı salmaqdır. Gözləntilərə görə, buna “Zen 6” arxitekturalı “AMD EPYC 9686F” sistemləri, MRDIMM yaddaş və PCIe Gen6 yaddaş qurğuları ilə çatmaq olar. Ancaq bunu təsdiqləyən sınaq nəticəsi hələ yoxdur. Adi masaüstü kompüterlərdə və noutbuklarda yığılma müddəti prosessordan asılı olaraq daha uzun olacaq.