Microsoft 365 24 saatdan çox çəkən qlobal nasazlıqdan sonra bərpa olundu

    “Microsoft” noyabrın 14-də “Microsoft 365” xidmətlərinin qalan bütün müştərilər və regionlar üçün yenidən işlədiyini açıqlayıb. 24 saatdan çox çəkən qlobal nasazlıq şirkətin son illərdə yaşadığı ən uzun fasilələrdən biri olub. Problem “Outlook”, “Teams”, “Copilot” və digər bulud xidmətlərinə girişi pozub. Dünyanın müxtəlif ölkələrində şirkətlər, dövlət qurumları və milyonlarla istifadəçi iş zamanı çətinliklə üzləşib.

    Nasazlıq noyabrın 12-də saat 20:17 radələrində “Exchange Online” xidmətində başlayıb. Saat 22:26-da problem digər “Microsoft 365” xidmətlərinə də yayılıb. “Microsoft” əvvəlcə buna qeyri-adi dərəcədə yüksək trafikin səbəb olduğunu düşünüb. Araşdırma zamanı serverlərin böyük hissəsi gözlənilmədən sıradan çıxıb, işlək qalan avadanlıq da artan yükü daşıya bilməyib.

    Serverləri yenidən işə salmaq cəhdləri əvvəlcə nəticə verməyib. Trafik bərpa olunanda serverlər yenidən cavab verməyi dayandırıb. Problem əvvəlki şəbəkə tutumu yeniləməsi zamanı yaranıb, son şəbəkə dəyişikliyindən sonra üzə çıxıb. Mühəndislər giriş yoxlamasını və trafikin yönləndirilməsini idarə edən hissə üçün düzəliş yayıblar. “Microsoft” kiberhücum və ya süni intellekt müdaxiləsini göstərən sübut tapmadığını deyib. Şirkət hadisə ilə bağlı ətraflı hesabat da hazırlayacaq.

    Nasazlıq “Teams” təqvimlərinə, görüşlərin planlaşdırılmasına, “SharePoint” və “Intune” xidmətlərinə də təsir edib. Bununla belə, bəzi funksiyalar işləməyə davam edib. Problem 70-dən çox ölkədə müşahidə olunub. “Downdetector” dünyada 7,4 milyondan çox nasazlıq bildirişi qeydə alıb, amma bu, ayrı-ayrı istifadəçilərin sayını göstərmir. Gecikən məktubların itməməsi üçün “Microsoft” növbə müddətini 48 saata qaldırıb. Xidmətlər açıldıqdan sonra çoxlu bildirişin eyni vaxtda gələcəyi gözlənilir.

    Britaniya Milli Səhiyyə Xidməti alternativ sistemlərə keçib, bəzi xəstəxanalarda prosedurların vaxtı dəyişdirilib. “Air India”, “IndiGo” və “Akasa Air” elektron poçt xidmətində problemlər yaşayıb. Maliyyə sektorunda da işlər dayanıb. Tayvandakı şirkətlərdən biri əməliyyatları təsdiqləmək üçün faksdan istifadə edib. Yaponiyada dövlət qurumları iş cədvəllərini jurnalistlərə kağız elanlarla çatdırmalı olub.

    “Maersk” müştərilərə məktub və bildirişlərin gecikə biləcəyi barədə xəbərdarlıq edib. Elektrik yük maşınları istehsalçısı “Workhorse Group” rüblük maliyyə hesabatını və investorlarla görüşünü növbəti həftəyə keçirib. “Calvin Klein” və “Tommy Hilfiger” brendlərinin sahibi “PVH Corp.” qlobal işçi qüvvəsinin 4 faizini ixtisar etdiyini açıqlayıb. Nasazlığa görə Asiyada bəzi əməkdaşlarla planlaşdırılan ixtisar görüşləri də baş tutmayıb.

    ABŞ-də Los Anceles dairəsi Şerif Departamentinin elektron poçt və rabitə sistemləri işləməyib. Koloradodakı Arapahoe dairəsində saxlanılan şəxslərin girov ödənişlərini internetdən etmək olmayıb, buna görə ödənişlər şəxsən qəbul edilib. Ostin şəhər rəhbərliyinin əməkdaşları da məktub göndərə və qəbul edə bilməyiblər. Stanford Universiteti və Corc Meyson Universiteti daxil olmaqla, bir neçə ali məktəbdə də oxşar fasilələr yaşanıb.