Microsoft Copilot Search süni zəka axtarış funksiyasını istifadəyə verib

     Süni zəka tədricən ənənəvi axtarış sistemlərini əvəz etməyə başlayır. Mart ayının əvvəlində Google şirkəti axtarış sistemini Gemini 2.0 süni zəkası ilə genişləndirdi, bundan əvvəl isə OpenAI öz süni intellekt əsaslı axtarış sistemi olan SearchGPT-ni təqdim etmişdi. Hətta alternativ platformalar, məsələn, DuckDuckGo belə, süni zəkanı sistemlərinə inteqrasiya etməyə başlayıblar. İndi isə bu prosesə Microsoft da qoşulub - şirkət öz Bing axtarış sisteminə Copilot Search adlı süni zəka axtarış funksiyasını əlavə edib.

     İstifadəçinin sorğusuna cavab olaraq Copilot Search internetin müxtəlif mənbələrindən məlumat toplayır, onları ümumiləşdirir və yekun cavab təqdim edir. Buna bənzər bir funksionallıq daha əvvəl Copilot Answers vasitəsilə təqdim olunurdu. Copilot Search təbii dili dəstəklədiyi üçün istifadəçi axtarış sorğusunu dəqiq formalaşdırmaq barədə narahat olmamalıdır. Məsələn, əgər belə soruşulsa: “57 dərəcə Farenhayt Selsi üzrə neçə dərəcədir?”, Copilot Search bunun bir temperatur çevrilməsi olduğunu anlayacaq.

     Axtarış sistemi yalnız cavabı təqdim etməyəcək, həm də bu çevrilmənin necə aparıldığını izah edəcək. Bing-dəki Copilot Answers funksiyasından fərqli olaraq, Copilot Search-in ayrıca interfeysi var və bu, Copilot-un özünü (eləcə də ChatGPT və digər çat-botları) xatırladır. İstifadəçi əlavə suallar verə bilər və bu funksiya əvvəlki sorğuları nəzərə alaraq dialoqu davam etdirir və daha dəqiq cavablar təqdim edir.

Mənbə: PCworld