Microsoft tətbiqləri sürətlə açan yeni üsulu Edge brauzerində sınayır

    “Microsoft” bəzi tətbiqlərin “Windows 11”də daha sürətli açılması üçün yeni üsulu sınaqdan keçirir. Release Preview kanalındakı son sınaq versiyasında dəyişiklik hələlik yalnız “Microsoft Edge” brauzerində işləyir. Brauzer arxa planda açıqdırsa, tapşırıqlar panelindən, “Start” menyusundan və ya keçiddən açılan yeni pəncərə daha tez görünür.

    Yeni üsul zamanı “Windows 11” əlavə və müvəqqəti proses açmır. Sistem sorğunu birbaşa brauzerin arxa planda işləyən nüsxəsinə göndərir. Bununla da açılış üçün tələb olunan addımlar azalır. Tam bağlanmış “Microsoft Edge” ilk dəfə nisbətən ləng açıla bilər. Brauzer bağlandıqdan sonra onun prosesləri arxa planda qalsa, növbəti açılış daha sürətli olur.

    “Microsoft” bu üsulu gələcəkdə digər “Windows 11” tətbiqlərində də işləyəcək ümumi funksiya kimi hazırlayır. Digər şirkətlərin proqramlarının funksiyadan nə vaxt yararlana biləcəyi hələ açıqlanmayıb. Funksiya açıldıqdan sonra proqram tərtibatçıları onu öz tətbiqlərinə ayrıca əlavə etməlidirlər.

    Bu mexanizm “Microsoft”un “Windows 11”i sürətləndirmək üçün gördüyü digər işlərə qoşulur. “Microsoft Edge” və “File Explorer” daha tez açılmaq üçün əvvəlcədən qismən yüklənir. “Low Latency Profile” funksiyası da prosessorun sistem menyularında və tətbiqlərdə verilən əmrlərə daha tez cavab verməsinə kömək edir. Sürətli açılış mexanizminin “Windows 11”in stabil versiyasına nə vaxt əlavə ediləcəyi hələ məlum deyil.