Microsoft Windows 11-də oyun qısayolları və axtarış yenilikləri təqdim etdi

    “Microsoft” “Windows 11” sisteminin sınaq versiyalarında “Xbox” oyun rejimi üçün yeni qısayollar əlavə edib. İstifadəçilər oyun rejimindən çıxmadan Bluetooth, Wi-Fi və enerji ayarlarını dəyişə bilirlər. Beləliklə, oyun vaxtı əsas bağlantı və sistem seçimlərini idarə etmək üçün masaüstünə qayıtmaq lazım deyil.

    “Windows 11” sistemində axtarış bölməsi də yenilənib. Nəticələri fayllara, əmrlərə və internet məlumatlarına görə ayırmaq olur. Axtarış sətrindən ekran parlaqlığını və səs səviyyəsini dəyişmək, həmçinin qoşulmuş telefondan zəng etmək də olar.

    Axtarış nəticələrində faylın son dəyişdirilmə vaxtı və müəllifi kimi əlavə məlumatlar göstərilir. Burada səhm qiymətlərinin qrafikləri və hava proqnozu da görünə bilər. İstifadəçilər bəyənmə və bəyənməmə işarələri ilə nəticələrin keyfiyyətini qiymətləndirə bilirlər. Bu rəylər gələcəkdə daha uyğun nəticələrin göstərilməsinə kömək edəcək.

    Yenilikləri hələlik yalnız “Windows Insider” proqramının iştirakçıları sınaqdan keçirirlər. Beta Build 26220.9836 və Experimental Build 26340.9843 artıq sınaqçılar üçün açılıb. “Microsoft” bu funksiyaların “Windows 11” sisteminin adi istifadəçilərinə nə vaxt çatacağını açıqlamayıb.