Microsoft Windows 11-i 20%-dək sürətləndirdiyini açıqladı

    “Microsoft” ilin əvvəlində “Windows 11”-in sürətini, etibarlılığını və istifadə rahatlığını artırmaq üçün plan açıqlamışdı. Aylarla aparılan düzəlişlərdən sonra şirkət əməliyyat sisteminin 20 faizə qədər daha çevik işlədiyini deyir. Sürət artımı “Start”, “File Explorer”, “Search” və “Edge” daxil olmaqla sistemin əsas bölmələrində hiss olunur.

    Əsas dəyişiklik yaddaşın və kompüterin gücünün daha düzgün bölüşdürülməsidir. “Windows 11” indi açıq tətbiqlərə daha çox resurs ayırır. Fərq xüsusilə 8 GB əməli yaddaşı (RAM) olan kompüterlərdə hiss olunmalıdır. Sistem aktiv məlumatların 2 GB-a qədər daha çox hissəsini RAM-da saxlayır və onları daha yavaş yaddaş qurğusuna köçürmür. Bu da proqramların daha çevik işləməsinə kömək edir.

    8 GB və daha az RAM olan kompüterlərdə “Widgets” bölməsi yalnız istifadəçi onu açanda yüklənir. Bunun sayəsində tətbiqlər və digər işlər üçün 200 MB-dan çox əməli yaddaş boş qalır. Beləliklə, yaddaşı az olan cihazlarda arxa plandakı proseslər kompüterin resurslarını lazımsız yerə tutmur.

    “Microsoft” “Windows Update” yeniləmələrinin gündəlik işə daha az mane olması üçün də dəyişikliklər edib. “Widgets” bölməsi sadələşdirilib, tapşırıqlar panelini ekranın yuxarısına və ya kənarlarına daşımaq olur. “Windows Hello” ilə giriş sürətlənib, Bluetooth cihazları daha sabit qoşulur. “AirPods” qulaqlıqlarının bağlantısı əvvəlkindən 15 saniyəyə qədər daha tez qurulur.

    Növbəti böyük yenilik daha sürətli və daha funksional “Windows Search” olacaq. Hazırda “Windows Insider” proqramının iştirakçıları yeni axtarış sistemini sınaqdan keçirirlər. Yenilik kompüterdəki fayl və məlumatları daha tez tapmaq üçündür. “Microsoft” funksiyanı bu ilin sonrakı aylarında daha çox istifadəçiyə açmağı planlaşdırır.